سعودی سکالر اور رابطہ عالم اسلامی کے سابق سربراہ ڈاکٹر عبداللہ عمر نصیف کا انتقال
سعودی سکالر اور رابطہ عالم اسلامی کے سابق سربراہ ڈاکٹر عبداللہ عمر نصیف کا انتقال
اتوار 12 اکتوبر 2025 18:07
نماز جنازہ جدہ میں جامع مسجد الجفالی میں ادا کی گئی۔ (فوٹو: اخبار 24)
سعودی سکالر، شوری کونسل کے سابق ڈپٹی سپیکر و رابطہ عالم اسلامی کے سابق سیکریٹری جنرل ڈاکٹرعبداللہ عمر نصیف اتوار کو جدہ میں انتقال کر گئے۔
ان کی عمر 86 برس تھی۔ نماز جنازہ جامع مسجد الجفالی میں عصر کی نماز کے بعد ادا کی گئی۔
اخبار 24 کے مطابق ڈاکٹر عبداللہ عمر نصیف سنہ 1939 میں جدہ میں پیدا ہوئے اور انہوں نے ابتدائی تعلیم وہی سے حاصل کی۔
انہوں نے سنہ 1964 میں کنگ سعود یونیورسٹی سے کیمسٹری میں گریجویشن کیا، برطانوی یونیورسٹی سے سنہ 1971 میں جیالوجی میں ڈاکٹریٹ کی ڈگری حاصل کرنے کے بعد جدہ کی کنگ عبدالعزیز یونیورسٹی میں شعبہ تدریس سے منسلک ہوئے۔
انہیں 1991 میں کنگ فیصل ایوارڈ سے بھی نوازا گیا۔ (فائل فوٹو: عرب نیوز)
ڈاکٹر نصیف نے مملکت کے داخلی اور خارجی امور میں اہم ذمہ داریاں بھی ادا کیں۔ وہ کنگ عبدالعزیز یونیورسٹی جدہ کے ڈائریکٹر بھی رہے۔
وہ رابطہ عالم اسلامی کے سیکریٹری جنرل، شوری کونسل کے ڈپٹی سپیکر، سنہ 2000 میں انٹرنیشنل اسلامک ریلیف آرگنائزیشن کے بورڈ کے چیئرمین، ورلڈ اسلامک کانفرنس کے چیئرمین کے علاوہ ورلڈ اسلامک کونسل برائے دعوت و ریلیف کے سیکرٹری جنرل بھی رہے۔
انہوں نے انٹرنیشنل سکاوٹس کمیٹی کے رکن اورانٹرنیشنل یونین آف مسلم سکاوٹس کے سربراہ کے طور پر بھی خدمات انجام دیں۔ دس سال تک سعودی نیشنل ڈائیلاگ کمیٹی کے نائب صدر رہے۔
انہیں 1991 میں اسلامی تعلیم اور اسلام کی خدمت کےلیے کنگ فیصل ایوارڈ سے بھی نوازا گیا۔
