جازان میں روایتی فنون میں نوجوانوں کو با اختیار بنانے کے لیے نیا پروگرام

جازان میں ایک نئی سکیم کے تحت نوجوانوں کو روایتی دستکاری سکھائی جا رہی ہے اور ان کی تخلیقی صلاحیتیوں میں اضافہ کیا جا رہا ہے۔

سعودی پریس ایجنسی کے مطابق ’دا کرافٹس مارکیٹ پروگرام‘،  مملکت کے ہیرٹِج کمیشن کے تحت قائم ہونے والے الرواد یُوتھ ایسوسی ایشن‘ اور ’کلچرل ہاؤس‘ کا ایک مشترکہ انیشیٹِیو ہے۔

اس پروگرام میں ممتاز مقامی کاریگروں کی زیرِ قیادت ورکشاپس منعقد کی جا رہی ہیں جس میں شرکا کو عملی تجربہ سے مسفتید ہونے کا موقع دیا جاتا ہے جس کی نگرانی اس کام کے پروفیشنل کر رہے ہوتے ہیں۔

ایس پی اے کے مطابق یہ سکیم نومبر کے آخر تک جاری رہے گی جس میں ہر جمعے اور سنیچر کو ’کلچرل ہاؤس‘ میں سیشن ہوا کریں گے۔

سیشن کے شرکا ظروف سازی، مجسمہ سازی، پینٹنگ، موم بتیاں، پرفیوم سازی، چمڑے کا کام، کڑھائی سلائی اور جیولری بنانے جیسے ہنر میں مہارت حاصل کر سکتے ہیں۔

فنکارانہ مہارتوں کے علاوہ ورکشاپس میں برانڈنگ اور چیزوں کی پیکجنگ کے عملی پہلو بھی سکھائے جائیں گے تاکہ نوجوان اپنی کاریگری کو کاروبار میں آسانی سے بدل سکیں۔

گزشتہ ہفتے ’کلچرل ہاؤس‘ نے ظروف سازی کی ورکشاپ کی میزبانی کی تاکہ اس روایتی مہارت کا پھر سے احیا ہو سکے جو اس ریجن کے بیش قیمت ورثے کو ظاہر کرتا ہے۔

اس کورس میں چیزوں کی تخلیق سے تکمیل تک کے تمام مراحل اور پہلؤں پر بات کئی گئی جس میں مٹی کہاں سے لینی ہے، اسے کیسے شکل دینی ہے، کیسے خشک کرنا ہے،  کیسے چمک لانی ہے اور اس تمام کام کے لیے کونسے ماحول دوست میٹریل استعمال کرنا ہے شامل تھے۔

کورس کے شرکا نے مٹی کی مختلف اقسام کے بارے میں نئی باتیں سیکھیں، خام مواد تیار کیا، ڈیزائن بنائے اور روایتی تنور یا بھٹی بنانے اور اسے استعمال کرنے کا علم بھی حاصل کیا۔