ریاض میں فیوچر انویسٹمنٹ انیشیٹیو کا آغاز آج، شہباز شریف سمیت عالمی رہنماوں کی شرکت

ریاض میں فیوچر انویسٹمنٹ انیشیٹیو (ایف آئی آئی 9) کانفرنس پیر27 اکتوبر سے شروع ہو رہی ہے جو 30 اکتوبر 2024 تک ریاض کے کنگ عبدالعزیز انٹرنیشنل کنونشن سینٹر میں جاری رہے گی۔

کانفرنس کا موضوع ’خوشحالی کی کنجی‘ ترقی کی نئی سرحدیں کھولنا ہے، پاکستان کے وزیراعظم شہباز شریف سمیت عالمی رہنما، سرمایہ کار اور ماہرین شرکت کررہے ہیں۔

پاکستانی دفتر خارجہ کے مطابق کانفرنس کے دوران وزیراعظم شہباز شریف کی سعودی قیادت کے ساتھ بھی ملاقاتیں متوقع ہیں جن میں تجارت، سرمایہ کاری، توانائی اور انسانی وسائل کے شعبوں میں تعاون بڑھانے پر غور کیا جائے گا۔ باہمی دلچسپی کے علاقائی اور عالمی امور پر بھی بات چیت ہو گی۔ 

دفتر خارجہ کا کہنا ہے کہ وزیراعظم کا دورہ اقتصادی سفارت کاری کو آگے بڑھانے اور سرمایہ کاری، ٹیکنالوجی اور پائیدار ترقی میں سٹریٹجک شراکت داری کو فروغ دینے کے لیے پاکستان کے عزم کو ظاہر کرتا ہے۔

 کانفرنس کا افتتاح پبلک انویسٹمنٹ فنڈ کے گورنر اور فیوچر انویسٹمنٹ انیشیٹیو فاونڈیشن کے بورڈ آف ٹرسٹیز کے چیئرمین یاسر الرمیان کریں گے۔

کانفرنس متوقع طور پر 8 ہزار سے زیادہ شرکا، 650 سے زیادہ سپیکرز کو 250 سیشنز میں جمع کرے گی۔ مستقبل کے حوالے سے مختلف موضوعات جن میں آزاد تجارت کےجغرافیائی سیاسی اثرات اور دیگر پر بحث کی جائے گی۔

فیوچر انویسٹنمٹ انیشیٹیو فاؤنڈیشن کے قائمقام سی ای او رچرڈ اٹیس کا کہنا ہے’ انیشیٹو کا نواں ایڈیشن ایک ایسا عالمی پلیٹ فارم ہوگا جس میں دنیا بھر سے ماہرین اور سرمایہ کاری کے حوالے سے اہم شخصیات شرکت کریں گی جو حکومتوں اور نجی شعبے کے اشتراک سے نئی کمپنیوں کے قیام اور انکی ترقی کےلیے جامع لائحہ عمل سے آگاہ کریں گی۔‘

انہوں نے بتایا’ اس ایونٹ میں دنیا کی نمایاں شخصیات شریک ہوں گی جن میں سعودی وزیر توانائی شہزادہ عبدالعزیز بن سلمان بن عبدالعزیز ، پبلک انویسٹمنٹ فنڈ کے گورنر اورسعودی ارامکو کے صدر و فیوچر انویسٹمنٹ انیشیٹو فاونڈیشن کے بورڈ آف ٹرسٹیزکے چیئرمین یاسر الرمیان، چینی نائب صدر ھان چنگ،بنگلہ دیشی عبوری حکومت کے سربراہ اور نوبل انعام یافتہ پروفیسر محمد یونس،  روسی براہ راست سرمایہ کاری فنڈ کے سی ای او کیریل دمیتریف، ورلڈ ٹریڈ آرگنائزیشن کے ڈائریکٹر جنرل ڈاکٹر نگوزی اوکونجو، ٹوکیو کی گورنر کے علاوہ دیگر اہم شخصیات شامل ہیں۔

 یہ کانفرنس ایک نمایاں عالمی پلیٹ فارم ہے جو ممتاز قائدین، سرمایہ کاروں اور پالیسی سازوں کو یکجا کرتا ہےتاکہ سرمایہ کاری کو بروئے کار لا کر انسانیت کے لیے ایک خوشحال اور پائیدار مستقبل تعمیر کرنے کے طریقوں کا جائزہ لیا جا سکے۔

کانفرنس میں اُن رکاوٹوں پر توجہ مرکوز کی جائے گی جو ترقی کی راہ میں حائل ہیں نیز کس طرح ٹیکنالوجی اور پالیسیوں میں ترقی کے عمل کو آگے بڑھایا جائے، کس طرح مصنوعی ذہانت اور نئی ابھرتی ٹیکنالوجیز مواقع فراہم کرتی ہیں۔ جغرافیائی سیاسی کشیدگیوں اور وسائل کی ناہمواری کا عالمی روابط پر کیا اثر پڑتا ہے۔