پاکستان سمیت دنیا بھر میں ’واٹس ایپ ویب‘ سروسز کچھ دیر معطل رہنے کے بعد بحال

پاکستان سمیت دنیا بھر میں واٹس ایپ ویب  کی سروسز کچھ دیر معطل رہنے کے بعد فعال ہو چکی ہیں۔

منگل کے روز سماجی رابطے کی ویب سائٹ ایکس (سابق ٹوئٹر) پر انٹرنیٹ صارفین کی بڑی تعداد نے سکرین شاٹس شیئر کرتے ہوئے رپورٹ کیا کہ کمپیوٹر ویب سائٹ پر واٹس ایپ کام نہیں کر رہا۔

سکرین شاٹس میں دیکھا جا سکتا ہے کہ واٹس ایپ کھولنے پر ویب سائٹ کی پوری سکرین خالی ہے، کوئی چیٹس، گروپس اور سٹیٹس نظر نہیں آ رہے۔

اس دوران موبائل فونز اور کمپیوٹر ایپ پر واٹس ایپ کی سروسز کام کر رہی تھیں۔

انٹرنیٹ پر مختلف ویب سائٹ اور ایپلی کیشنز کی سروسز معطلی سے متعلق اطلاع دینے والی ویب سائئٹ ڈاؤن ڈٹیکٹر نے بھی رپورٹ کیا تھا کہ دنیا بھر میں صارفین واٹس ایپ ڈاؤن ہونے کی شکایات کر رہے ہیں۔

اس حوالے سے واٹس ایپ کی مالک کمپنی میٹا نے تاحال کوئی وضاحت جاری نہیں کی۔