برطانوی حکومت کا نیا منصوبہ، تارکین وطن کو مستقل پناہ کے لیے 20 برس انتظار کرنا ہو گا
برطانوی حکومت کا نیا منصوبہ، تارکین وطن کو مستقل پناہ کے لیے 20 برس انتظار کرنا ہو گا
اتوار 16 نومبر 2025 6:20
برطانیہ میں ایک نیا اصلاحی منصوبہ متعارف کرایا جا رہا ہے جس کے تحت اب پناہ گزینوں کو اُس وقت تک ملک میں مستقل رہائش کے بجائے عارضی پناہ دی جائے گی جب تک کہ ان کا اپنے ملک واپس جانا محفوظ نہ ہو جائے۔
فرانسیسی خبر رساں ایجسنی اے ایف پی کے مطابق برطانیہ نے کہا ہے کہ وہ اسائلم نظام میں بڑے پیمانے پر اصلاحی منصوبے کے تحت پناہ گزینوں کو دی جانے والی حفاظتی سہولیات میں نمایاں کمی کرے گا۔
لیبر حکومت کی جانب سے یہ اقدامات ایسے وقت میں سامنے آئے ہیں جب وزیراعظم کیئر سٹارمر کو غیرمنظم امیگریشن کے معاملے پر تنقید کا سامنا ہے۔
برطانوی وزیر داخلہ شبانہ محمود نے ایک بیان میں کہا کہ ’میں برطانیہ کا پناہ گزینوں کے لیے گولڈن ٹکٹ ختم کر دوں گی۔‘
موجودہ نظام میں جن تارکین وطن کو پناہ گزین کا درجہ مل جاتا ہے انہیں پانچ سال کے لیے رہنے کی اجازت دی جاتی ہے اور اس کے بعد وہ مستقل رہائش کے لیے درخواست دے سکتے ہیں۔ مستقل رہائش ملنے کے بعد وہ برطانوی شہریت کے لیے درخواست دے سکتے ہیں۔
تاہم ہوم آفس نے اعلان کیا ہے کہ پناہ گزین کے سٹیٹس کی مدت کم کر کے 30 ماہ کر دی جائے گی۔
اس تحفظ کو باقاعدگی سے جانچا جائے گا اور جب متعلقہ ممالک محفوظ قرار پائے تو پناہ گزینوں کو واپس جانے پر مجبور کیا جائے گا۔
وزارت نے یہ بھی کہا کہ جن پناہ گزینوں کو برطانیہ میں پناہ دی جائے گی انہیں طویل مدتی رہائش کے لیے درخواست دینے سے پہلے 20 برس تک انتظار کرنا ہوگا جو موجودہ طے شدہ مدت پانچ سال سے چار گنا زیادہ ہے۔
ہوم آفس نے ان تجاویز کو ’جدید دور میں اسائلم پالیسی کی سب سے بڑی اصلاح‘ قرار دیا ہے۔
ہوم آفس نے اعلان کیا ہے کہ پناہ گزین کے سٹیٹس کی مدت کم کر کے 30 ماہ کر دی جائے گی (فوٹو: روئٹرز)
ایکس پر پوسٹ کی گئی ایک ویڈیو میں شباہ محمود نے کہا کہ ’ہمیں یہاں غیر قانونی طور پر آنے والوں کی تعداد میں کمی لانی ہے، ہمیں ان لوگوں کو مزید تعداد میں واپس بھیجنا ہے جن کا یہاں رہنے کا حق نہیں۔‘
وزیرِاعظم کیئر سٹارمر پر فرانس سے چھوٹی کشتیوں کے ذریعے انگلش چینل عبور کرنے والے تارکین وطن کو روکنے کا دباؤ بڑھتا جا رہا ہے۔
رواں سال اب تک 39 ہزار سے زائد افراد خطرناک سفر طے کر کے برطانیہ پہنچ چکے ہیں۔ یہ تعداد 2024 کے پورے سال سے زیادہ ہے تاہم 2022 میں ریکارڈ کی گئی تعداد سے کم ہے۔
برطانیہ میں اسائلم کی درخواستیں ریکارڈ سطح پر پہنچ چکی ہیں۔ سرکاری اعداد و شمار کے مطابق جون 2025 تک تقریبا 111,000 درخواستیں موصول ہوئی ہیں۔
