بغیر دستاویزات مسافروں کو سفر کی اجازت نہ دی جائے، وزیر داخلہ کا لاہور ایئرپورٹ کا اچانک دورہ

وفاقی وزیرداخلہ محسن نقوی اور وفاقی وزیر برائے اوورسیز پاکستانی چوہدری سالک حسین نے اتوار کو لاہور ایئرپورٹ  کا اچانک دورہ کیا اور امیگریشن کے عمل کا مشاہدہ کیا۔

دونوں وزراء دو  گھنٹے تک ایئرپورٹ پر موجود رہے اور اس دوران  بیرون ممالک جانے والے مسافروں سے بات چیت کی اور امیگریشن کے عمل کے بارے میں پوچھ گچھ کی۔  

وزیر داخلہ محسن نقوی نے امیگریشن کاؤنٹرز پر رش دیکھ  کر ناراضگی کا اظہار کرتے ہوئے پراسیس جلد نمٹانے کے احکامات دیے۔

وفاقی وزیر سالک حسین نے سفری دستاویزات پر پروٹیکر سٹیکرز چیک کیے۔ پروٹیکر کے تحت ڈرائیور کی ملازمت کے لیے بیرون ملک جانے والے نوجوان کو ڈرائیونگ لائسنس نہ ہونے پر سفر سے روک دیا گیا۔

وفاقی وزیر سالک حسین نے برہمی کا اظہار کرتے ہوئے انکوائری کا حکم دیا۔ انہوں نے کہا کہ ​پروٹیکر کے تحت مسافروں کی متعلقہ ملازمت کی مستند دستاویزات کی تصدیق ہر صورت کی جائے۔

ایف آئی اے اہلکار کی مبینہ ملی بھگت سے بیرون ملک جانے والے مسافر کو امیگریشن عملے نے کاؤنٹر پر روک لیا۔ آف لوڈ مسافر کو نجی کمپنی کو ادا کی گئی رقم واپس دلانے کی یقین دہانی کرائی گئی۔

وزیرداخلہ محسن نقوی نے دونوں نوجوانوں کو روکنے والے امیگریشن اہلکاروں کو شاباش دی اور انعام دیا جبکہ تعریفی سرٹیفکیٹس بھی دینے کا اعلان کیا۔

انہوں نے کہا کہ ضروری دستاویزات کے بغیر کسی بھی مسافر کو سفر کی اجازت ہرگز نہ دی جائے۔ ’غیر قانونی امیگریشن  قطعی طور پر برداشت نہیں ہوگی۔‘

وزیر داخلہ محسن نقوی کا کہنا تھا کہ ملک کی بدنامی کا باعث بننے والے کسی مسافر کو سفر کی اجازت ہرگز نہیں دی جائے گی۔ ایف آئی اے یا کسی بھی ادارے کے ملوث اہلکاروں کے خلاف سخت ایکشن لیا جائے گا۔