گوتم گمبھیر کے ساتھ اختلافات، وراٹ کوہلی نے اہم ڈومیسٹک لیگ کھیلنے سے انکار کر دیا

مشہور انڈین کرکٹر وراٹ کوہلی نے بی سی سی آئی کے اہم ترین ڈومیسٹک کرکٹ لیگ ’وجے ہزارے ٹرافی‘ کھیلنے سے انکار کر دیا ہے۔

این ڈی ٹی وی کے مطابق وراٹ کوہلی اور انڈین کرکٹ ٹیم کے ہیڈ کوچ گوتم گمبھیر کے درمیان مستقبل کے حوالے سے پیدا ہونے والے اختلافات تعلقات میں سرد مہری کا سبب بن رہے ہیں۔

رپورٹ کے مطابق روہت شرما پہلے ہی بی سی سی آئی کی سلیکشن کمیٹی کو اپنی دستیابی سے آگاہ کر چکے ہیں اور وہ ممبئی کی نمائندگی کے لیے تیار ہیں۔

تاہم ان کے برعکس وراٹ کوہلی نے ’وجے ہزارے ٹرافی‘ میں نہ کھیلنے کا فیصلہ کیا ہے۔ روہت شرما اس سے قبل ’سید مشتاق علی ٹی 20 ٹورنامنٹ‘ میں بھی شریک ہو کر اپنی میچ فٹنس برقرار رکھنے کی کوشش کر چکے ہیں۔

وراٹ کوہلی کے قریبی حلقوں کا مؤقف ہے کہ وہ ’ضرورت سے زیادہ تیاری‘ کے حامی نہیں اور اپنی جسمانی فٹنس اور ذہنی طور پر تیار رہنے کو کافی سمجھتے ہیں جبکہ دوسری طرف بی سی سی آئی کو خدشہ ہے کہ ایک سٹار پلیئر کے لیے خصوصی رعایت دینے سے باقی کھلاڑیوں میں غلط پیغام جا سکتا ہے۔

رپورٹ کے مطابق بی سی سی آئی ذرائع کا کہنا ہے کہ ’مسئلہ وجے ہزارے ٹرافی میں شرکت کا ہے۔ وہ کھیلنا ہی نہیں چاہتے۔ جب روہت شرما بھی کھیل رہے ہیں تو ایک کھلاڑی کے لیے استثنا کیسے دیا جا سکتا ہے؟ پھر ہم باقی کھلاڑیوں کو کیا بتائیں؟‘

بی سی سی آئی اور کوچنگ سٹاف مسلسل قومی ٹیم کے کھلاڑیوں کو ڈومیسٹک کرکٹ میں شرکت پر زور دیتے رہے ہیں۔

آسٹریلیا کے خلاف ٹیسٹ سیریز میں شکست کے بعد بھی یہی پالیسی تھی جس کے تحت وراٹ کوہلی اور روہت شرما دونوں نے رانجی ٹرافی میں حصہ لیا تھا۔

جنوبی افریقہ کے خلاف رانچی میں کھیلے گئے پہلے ون ڈے کے بعد کوہلی نے کہا تھا کہ وہ زیادہ پریکٹس کے قائل نہیں اور ان کی کرکٹ ہمیشہ ذہنی مضبوطی پر مبنی رہی ہے۔ انہوں نے اعتراف کیا کہ وہ اپنی فٹنس اور مضبوط بنیاد کی وجہ سے اعتماد محسوس کرتے ہیں۔

رپورٹ کے مطابق بی سی سی آئی نے حالات مزید خراب ہونے سے روکنے کے لیے قومی سلیکٹر پراگیان اوجھا کو رائے پور بھیج دیا ہے جہاں انڈیا اور جنوبی افریقہ کے درمیان دوسرا ون ڈے کھیلا جا رہا ہے تاکہ وراٹ کوہلی اور گوتم گمبھیر کے درمیان بڑھتی کشیدگی کو کم کیا جا سکے۔