’وہ بھی بے نقاب ہوگا جو ڈکی نہیں بتا سکا‘، یوٹیوبر رجب بٹ کی برطانیہ سے بے دخلی؟

نجی چینل کے صحافی مرتضیٰ علی شاہ نے دعویٰ کیا ہے کہ معروف پاکستانی یوٹیوبر رجب بٹ کو برطانیہ سے نکال دیا گیا ہے تاہم ان کے وکیل میاں علی اشفاق نے سوشل میڈیا پلیٹ فارم ایکس پر لکھا کہ انہیں ’ڈی پورٹ نہیں کیا گیا بلکہ وپ اپنی مرضی سے واپس آ رہے ہیں۔‘

منگل کو اپنے سوشل میڈیا پلیٹ فارمز پر ویڈیو پیغام شیئر کرتے ہوئے مرتضیٰ علی نے دعویٰ کیا کہ برطانیہ کی حکومت نے رجب بٹ کا ویزا منسوخ کر کے انہیں برطانیہ سے بے دخل کر دیا ہے۔ 

ان کے مطابق رجب بٹ پر برطانوی حکومت نے یہ الزام لگایا کہ جب ڈیڑھ برس قبل رجب نے ویزا اپلائی کیا تھا تو اس وقت انہوں نے خود پر چلنے والے کیسز کی تفصیلات فراہم نہیں کی تھیں۔

مرتضیٰ علی نے یہ دعویٰ کیا کہ رجب بٹ اب برطانیہ سے واپس پاکستان روانہ ہو گئے ہیں اور ان کے ساتھ ان کے دوست ندیم مبارک عرف ندیم نانی والا بھی موجود ہیں۔

مزید یہ کہ ’کچھ ہفتے قبل رجب اور ندیم کو برطانوی انسداد دہشت گردی ایجنسی ایم آئی 6 نے غیرقانونی کارروائیوں کے الزامات لگنے کے بعد گرفتار کیا تھا۔ تفتیش کے بعد ان پر لگے الزامات بوگس ثابت ہوئے مگر اس ہی دوران جب ہوم آفس کو بتایا گیا تو ان پر موجود پاکستان میں جاری کیسز کی تفصیلات سامنے آئیں۔‘

ویڈیو میں دعویٰ کیا گیا کہ ندیم مبارک نے اس واقعے کی تصدیق کی ہے کہ انہیں اور رجب کو گرفتار کیا گیا تھا جبکہ برطانوی پاسپورٹ ہونے کے باعث انہیں چھوڑ دیا گیا اور رجب کا ویزا منسوخ کر دیا گیا۔

دوسری جانب ویڈیو پوسٹ کے نیچے ندیم مبارک نے کمنٹ کرتے ہوئے وضاحت کی کہ ’رجب کا ویزا منسوخ ہوا ہے، میرا نہیں کیونکہ میں واحد شخص ہوں جو مستقل برطانوی شہری ہے۔ اُس کا ویزا چند دن پہلے منسوخ کیا گیا۔‘

’میں اُسے پاکستان بطور والینٹیئر لے کر جا رہا ہوں، اور ہم مل کر این سی سی آئی کے مسائل حل کریں گے۔ انہوں نے میرے خلاف دو جعلی ایف آئی آرز اور رجب کے خلاف ایک ایف آئی آر درج کی ہے۔ ہمارے پاس اسلام آباد ہائی کورٹ کا سٹے آرڈر موجود ہے تاکہ ایئرپورٹ پر ہمیں گرفتار نہ کیا جائے۔‘

ندیم نے مزید لکھا کہ ’ہم یہ ٹرائل کا سامنا کریں گے، اور میں وہ سب کچھ بے نقاب کروں گا جو ہوا تھا وہ باتیں جو شاید ڈکی بھائی کھل کر نہیں بتا سکے۔‘

رجب بٹ کے وکیل کا موقف

رجب بٹ کے وکیل میاں علی اشفاق نے ’ایکس‘ پر اپنی پوسٹ میں لکھا کہ ’رجب بٹ کو برطانیہ سے ڈی پورٹ نہیں کیا گیا۔ میں وکیل کے طور پر ان کی نمائندگی کرتا ہوں، میرے پاس اس قانونی پوزیشن کے لیے تمام درست دستاویزی ثبوت موجود ہیں۔‘

انہوں نے لکھا کہ ’رجب بٹ نے پاکستان واپسی کے لیے اپنی مرضی سے برطانیہ چھوڑا ہے اور آج ہی اسلام آباد ہائی کورٹ کے سامنے سرنڈر کر چکے ہیں اور ایسا کرتے ہوئے انہیں بغیر کسی رکاوٹ کے اسلام آباد تک رسائی کی اجازت دی گئی ہے۔‘

’وہ کل اسلام آباد ہائی کورٹ میں بھی ذاتی طور پر عدالتی احکامات کی تعمیل میں پیش ہوں گے۔‘