امریکہ میں مستقل رہائش کا موقع، 10 لاکھ ڈالر کے ’گولڈ کارڈ‘ پروگرام کا آغاز

امریکی صدر ڈونلڈ ٹرمپ نے اعلان کیا ہے کہ گولڈ کارڈ جس کا انہوں نے طویل عرصے سے وعدہ کر رکھا تھا، باضابطہ طور پر فروخت کے لیے پیش کر دیا گیا ہے۔

خبر رساں ایجنسی ایسوسی ایٹڈ پریس کے مطابق صدر ٹرمپ نے بدھ کو وائٹ ہاؤس کے روزویلٹ روم میں کاروباری رہنماؤں کی موجودگی میں پروگرام کے آغاز کا اعلان کیا اور اس کے ساتھ ہی درخواستیں قبول کرنے والی ویب سائٹ بھی لائیو ہو گئی۔

اس کا مقصد غیر ملکی سرمایہ کاری کو فروغ دینے کے لیے 1990 میں کانگریس کی جانب سے متعارف کرائے گئے ای بی-5 ویزا کا متبادل فراہم کرنا ہے۔

یہ ویزا اُن افراد کے لیے دستیاب تھا جو تقریباً 10 لاکھ ڈالر خرچ کرکے ایسی کمپنی قائم کرتے جو کم از کم دس افراد کو ملازمت فراہم کرے۔

صدر ٹرمپ اس نئے ورژن کو امریکہ کے لیے اعلیٰ صلاحیت کے حامل لوگوں کو راغب کرنے اور اس کے ساتھ ساتھ وفاقی خزانے کے لیے آمدنی پیدا کرنے کا ذریعہ سمجھتے ہیں۔

وہ کئی مہینوں سے گولڈ کارڈ پروگرام کی تشہیر کر رہے ہیں اور انہوں نے ایک موقع پر کہا تھا کہ ہر کارڈ کی قیمت 50 لاکھ ڈالر ہوگی، اگرچہ بعد میں انہوں نے یہ قیمت کم کرکے 10 لاکھ اور20 لاکھ مقرر کر دی تھی۔

صدر نے کہا کہ اس پروگرام کے تحت حاصل ہونے والی تمام رقم ’امریکی حکومت کو جائے گی‘ اور انہوں نے یہ پیش گوئی کی کہ اربوں ڈالر محکمہ خزانہ کے زیرِ انتظام ایک کھاتے میں آئیں گے جس سے ہم ملک کے لیے مثبت کام کر سکیں گے۔‘

نیا پروگرام دراصل ایک گرین کارڈ ہے، جو مؤثر طور پر مستقل قانونی رہائش اور بعد میں شہریت کا موقع فراہم کرتا ہے۔

امریکی صدر نے کہا کہ بنیادی طور پر یہ ایک گرین کارڈ ہی ہے لیکن اس سے کہیں بہتر، زیادہ طاقت ور، کہیں مضبوط راستہ۔

صدر نے ان کمپنیوں کے لیے ملازمتیں پیدا کرنے کی کسی شرط کا ذکر نہیں کیا جو اس پروگرام کے لیے درخواست دیں گی۔

انہوں نے کہا کہ انہیں کاروباری رہنماؤں کی شکایات سننے کو ملی ہیں جو امریکی یونیورسٹیوں کے باصلاحیت فارغ التحصیل افراد کو اس لیے نہیں رکھ پاتے تھے کیونکہ ان کا تعلق دوسرے ملکوں سے ہوتا ہے اور انہیں امریکہ میں رہنے کی اجازت نہیں۔

صدر ٹرمپ کا کہنا تھا کہ ’بہترین کالجوں سے لوگوں کو اس لیے نہیں رکھ سکتے کہ آپ کو معلوم ہی نہیں ہوتا کہ آیا آپ اس شخص کو یہاں رکھ پائیں گے یا نہیں۔‘

کامرس سیکریٹری ہاورڈ لٹنک نے کہا کہ اس پروگرام میں درخواست دہندگان کی جانچ پڑتال کے لیے 15 ہزار ڈالر مختص کیے جائیں گے، اور ماضی کی تفصیلی چھان بین کا عمل یہ یقینی بنائے گا کہ یہ افراد امریکہ میں رہائش اختیار کرنے کے اہل ہیں۔

انہوں نے کہا کہ کمپنیوں کو کئی کارڈز مل سکتے ہیں، لیکن ہر کارڈ صرف ایک فرد کے لیے محدود ہوگا۔

کامرس سیکریٹری ہاورڈ لٹنک نے یہ بھی کہا کہ موجودہ گرین کارڈ ہولڈرز کی آمدنی اوسط امریکی کی آمدنی سے کم ہے، اور ٹرمپ اسے تبدیل کرنا چاہتے ہیں۔