سعودی وزیر خارجہ کی فلسطینی نائب صدر سے غزہ اور مغربی کنارے کی صورتحال پر گفتگو

سعودی وزیرخارجہ شہزادہ فیصل بن فرحان سے بدھ کو ریاض میں فلسطینی اتھارٹی کے نائب صدر حسین الشیخ نے ملاقات کی ہے۔

ایس پی اے کے مطابق ملاقات میں غزہ اور مغربی کنارے کی صورتحال پر تبادلہ خیال کیا گیا۔

غزہ کے باشندوں کو درپیش سنگین انسانی مصائب، اسرائیل کی جانب سے جنگ بندی کی مسلسل خلاف ورزیوں اور مغربی کنارے میں اسرائیلی جارحیت پر بھی بات کی گئی۔

 کسی رکاوٹ کے بغیر انسانی امداد کی فراہمی یقینی بنانے، فلسطینی اتھارٹی کے فنڈز کے اجرا، فلسطینی بنکنگ نظام کے تحفظ، صدر ٹرمپ کے غزہ امن منصوبے عملدرآمد  اور فلسطینی صدر محمود عباس کی جانب سے شروع کردہ اصلاحاتی پروگرام  کےلیے مملکت کی جانب سے سپورٹ کی اہمیت پر زور دیا گیا۔

فلسطینی عوام کےجائز حقوق کو یقینی بنانے کے حوالے سے جاری کوششوں جس میں ایک خود مختار ریاست کے قیام جس کا دارالحکومت مشرقی یروشلم ہو پر بھی بات کی گئی۔

اس موقع پر وزیرخارجہ کے مشیر برائے سیاسی امور شہزادہ مصعب بن محمد الفرحان اور وزارت خارجہ کی عہدیدار ڈاکٹر منال رضوان بھی موجود تھیں۔