ٹی20 ورلڈ کپ: پاکستان کا ٹاس جیت کر نمیبیا کے خلاف بیٹنگ کا فیصلہ
بدھ 18 فروری 2026 12:03
سوشل ڈیسک -اردو نیوز
اس سے پہلے پاکستان کو انڈیا نے 61 رنز سے شکست دی تھی (فوٹو: اے ایف پی)
ٹی20 ورلڈ کپ کے 35ویں گروپ میچ میں پاکستان نے ٹاس جیت کر نمیبیا کے خلاف بیٹنگ کا فیصلہ کیا ہے۔
کولمبو میں میچ کا آغاز پاکستانی وقت کے مطابق دوپہر 2:30 پر ہو گا۔
ٹی20 ورلڈ کپ کے سُپر ایٹ مرحلے میں پاکستان کی رسائی کے لیے اس میچ میں فتح یا میچ کے بغیر کسی نتیجے کے ختم ہونا ضروری ہے۔
میچ جیتنے کی صورت میں پاکستان کو دو پوائنٹس ملیں گے جبکہ بغیر نتیجہ ختم ہوئے دونوں ٹیموں کو ایک ایک پوائنٹ حاصل ہو گا۔
بصورت دیگر پاکستان کا ایونٹ میں سفر تمام ہو جائے گا۔
اس سے قبل پاکستان نے امریکہ اور نیدر لینڈز سے میچز جیت رکھے ہیں جبکہ انڈیا سے 61 رنز سے شکست کھا رکھی ہے۔ یوں پوائنٹس ٹیبل پر چار پوائنٹس کے ساتھ پاکستان گروپ اے میں تیسرے نمبر پر ہے۔
میچ کے دوران موسم کیسا ہو گا؟
کولمبو میں میچ کے آغاز کے وقت ہلکی بارش کی پیشگوئی ہے تاہم بعد میں موسم صاف ہونے کا امکان ظاہر کیا گیا ہے۔
اگر بارش کے باعث میچ مکمل نہ ہو سکا اور منسوخ ہو گیا تو دونوں ٹیموں کو ایک، ایک پوائنٹ ملے گا جو پاکستان کو سپر ایٹ میں پہنچانے کے لیے کافی ہوگا۔
پاکستان کی پلیئنگ الیون
پاکستان کی پلیئنگ الیون صاحبزادہ فرحان، صائم ایوب، سلمان علی آغا (کپتان)، بابر اعظم، عثمان خان (وکٹ کیپر)، خواجہ نافع، شاداب خان، محمد نواز، فہیم اشرف، سلمان مرزا اور عثمان طارق پر مشتمل ہے۔
نمیبیا کی پلیئنگ الیون
نمیبیا کی پلیئنگ الیون میں لورین سٹین کیمپ، جان فرائلنک، جان نکول لوفتی ایٹن، گیرہارڈ اراسمس (کپتان)، الیگزینڈر بوسنگ وولسخینک، جے جے سمتھ، زین گرین (وکٹ کیپر)، روبن ٹرمپلمین، ویسل مائی برگ، برنارڈ شولٹز اور جیک بریسل شامل ہیں۔
