ٹی20 ورلڈ کپ کے سپر ایٹ مرحلے کے اہم میچ میں انگلینڈ نے پاکستان کو دو وکٹوں سے شکست دے کر سیمی فائنل کے لیے کوالیفائی کر لیا ہے۔
منگل کو پالیکیلے میں پاکستان کے 165 رنز کا ہدف انگلینڈ نے آخری اوور کی پہلی گیند پر آٹھ وکٹوں کے نقصان پر حاصل کیا۔
کپتان ہیری بروک کی 51 گیندوں پر سینچری نے انگلینڈ کی فتح میں اہم کردار ادا کیا جبکہ شاہین آفریدی کی چار اور عثمان طارق کی دو وکٹیں بھی پاکستان کو شکست سے نہ بچا سکیں۔ پاکستان کی سیمی فائنل میں شرکت اب ’اگر مگر‘ سے مشروط ہو گئی ہے۔
اس سے قبل پاکستان نے پہلے بیٹنگ کرتے ہوئے مقررہ 20 اوورز میں نو وکٹوں کے نقصان پر 164 رنز بنائے تھے۔
مزید پڑھیں
-
-
ٹی20 ورلڈ کپ: کیا انڈیا سیمی فائنل کے لیے کوالیفائی کر سکتا ہے؟Node ID: 900998 -
پاکستان کی جانب سے صاحبزادہ فرحان نے عمدہ بیٹنگ کرتے ہوئے 63 رنز کی اننگز کھیلی جبکہ فخر زمان نے ٹی20 ورلڈ کپس میں پاکستان کی جانب سے سب سے زیادہ چھکے لگانے والے کھلاڑی کا ریکارڈ اپنے نام کیا۔
انگلینڈ کی اننگز
165 رنز کے ہدف کے تعاقب میں انگلینڈ نے بیٹنگ کا آغاز کیا تو فِل سالٹ اور جوس بٹلر کریز پر آئے، تاہم ٹیم آغاز ہی مشکلات کا شکار رہی۔ انگلینڈ کو پہلا نقصان پہلی ہی گیند پر اٹھانا پڑا جب فِل سالٹ بغیر کوئی رن بنائے شاہین شاہ آفریدی کی گیند پر عثمان خان کو کیچ دے بیٹھے۔
اسی اوور میں جوس بٹلر بھی صرف دو رنز بنا کر شاہین شاہ آفریدی کا شکار بنے اور عثمان خان نے اُن کا کیج لیا۔
کپتان ہیری بروک نے ٹیم کو سہارا دینے کی کوشش کی اور شاندار بیٹنگ کا مظاہرہ کرتے ہوئے 50 گیندوں پر 100 رنز کی جارحانہ اننگز کھیلی، جس میں 10 چوکے اور چار چھکے شامل تھے، تاہم وہ بھی شاہین شاہ آفریدی کی گیند پر بولڈ ہوئے۔
جیکب بیتھل آٹھ رنز بنا کر صاحبزادہ فرحان کے ہاتھوں کیچ آؤٹ ہوئے، یہ وکٹ بھی شاہین شاہ آفریدی نے حاصل کی۔ ٹام بینٹن دو رنز بنا کر عثمان طارق کا شکار بنے۔
سیم کرن نے 16 رنز کی اننگز کھیلی مگر وہ محمد نواز کے ہاتھوں کیچ آؤٹ ہوئے، جبکہ وِل جیکس 28 رنز بنا کر محمد نواز کی گیند پر بولڈ ہوگئے۔
جیمی اوورٹن کھاتہ کھولے بغیر آؤٹ ہوئے۔ آخر میں لیام ڈاسن ایک اور جوفرا آرچر پانچ رنز کے ساتھ ناٹ آؤٹ رہے۔
پاکستان کی جانب سے شاہین شاہ آفریدی نے تباہ کن بولنگ کرتے ہوئے چار کھلاڑیوں کو آؤٹ کیا، جبکہ محمد نواز اور عثمان طارق نے دو دو وکٹیں حاصل کی۔
پاکستان کی اننگز
پاکستان نے ٹاس جیت کر اننگز کا آغاز کیا تو صاحبزادہ فرحان اور صائم ایوب کریز پر اُترے، تاہم پاکستان کو ابتدائی نقصان جلد ہی اُٹھانا پڑا۔
صائم ایوب ایک مرتبہ پھربڑی اننگز ناکام میں ناکام رہے اور تیسرے اوور کی پہلی گیند پر پانچ رنز بنا کر آؤٹ ہو گئے۔
ون ڈاؤن پوزیشن پر آنے والے کپتان سلما علی آغا بھی ناکام رہے، وہ صرف پانچ رنز بنا کر کیچ آؤٹ ہوئے۔ بابر اعظم ایک مرتبہ پھر اچھی کارکردگی نہ دکھا سکے، وہ 24 گیندوں پر 25 رنز بنا کر پویلین لوٹ گئے۔
اوپنر صاحبزادہ فرحان 63 رنز بنا کر آؤٹ ہوئے، ان کی اننگز میں سات چوکے اور دو چھکے شامل تھے۔
فخر زمان 16 گیندوں پر دو چھکوں اور دو چوکوں کی مدد سے 25 رنز بنا کر آؤٹ ہوئے تاہم اس کے بعد انہوں نے ٹی20 میں سب سے زیادہ چھکے لگانے والے بیٹر کا ریکارڈ اپنے نام کرلیا ہے۔
اس کے بعد شاداب خان 23، عثمان خان آٹھ، محمد نواز صفر، شاہین آفریدی دو رنز بنا کر آؤٹ ہوئے جبکہ سلمان مرزا دو رنز کے ساتھ ناٹ آؤٹ رہے۔
یاد رہے کہ سُپر ایٹ مرحلے کے پہلے میچ میں پاکستان اور نیوزی لینڈ مدمقابل تھے جو بارش کی وجہ سے منسوخ ہو گیا تھا اور دونوں ٹیموں کو ایک ایک پوائنٹ دے دیا گیا تھا۔
انگلینڈ کے خلاف میچ کے لیے پاکستان کی ٹیم میں ایک تبدیلی کی گئی تھی۔ فہیم اشرف کی جگہ شاہین آفریدی کو پلیئنگ الیون کا حصہ بنایا گیا تھا۔
پاکستان کی پلیئنگ الیون
اس میچ میں پاکستان کی پلیئنگ الیون صاحبزادہ فرحان، صائم ایوب، سلمان علی آغا (کپتان)، بابر اعظم، فخر زمان، عثمان خان (وکٹ کیپر)، شاداب خان، محمد نواز، شاہین شاہ آفریدی، سلمان مرزا اور عثمان طارق پر مشتمل تھی۔
انگلینڈ کی پلیئنگ الیون
اس میچ میں انگلینڈ کی پلیئنگ الیون فل سالٹ، جوس بٹلر (وکٹ کیپر)، جیکب بیتھل، ٹام بینٹن، ہیری بروک (کپتان)، سیم کرن، ول جیکس، لیام ڈاسن، جیمی اوورٹن، جوفرا آرچر اور عادل رشید پر مشتمل تھی۔
