ایران کے سپریم لیڈر کی امریکہ کو سخت وارننگ، ’ناقابلِ فراموش سبق سکھائیں گے‘

ایران کے سپریم لیڈر مجتبیٰ خامنہ ای نے امریکہ کو خبردار کرتے ہوئے کہا ہے کہ اگر امریکی حملے جاری رہے تو ایران اور ’محاذِ مزاحمت‘ امریکہ کو ’ناقابلِ فراموش سبق‘ سکھائیں گے۔

خبر رساں ایجنسیوں کے مطابق سنیچر کو ایران کے سرکاری ٹیلی ویژن پر مجتبیٰ خامنہ ای سے منسوب ایک نیا بیان پڑھ کر سنایا گیا تاہم جنگ شروع ہونے کے بعد سے وہ اب تک عوامی منظر پر نہیں آئے ہیں۔

اپنے بیان میں مجتبیٰ خامنہ ای نے امریکی صدر ڈونلڈ ٹرمپ کے دستخط کو بھی ’بے وقعت اور غیر مؤثر‘ قرار دیا۔

ان کا یہ بیان ایسے وقت میں سامنے آیا ہے جب ایران کے ایک مذاکرات کار نے ہفتے کے روز اعلان کیا کہ ’تہران تقریباً ایک ماہ قبل امریکہ کے ساتھ طے پانے والے عبوری معاہدے کے تحت اپنی ذمہ داریاں معطل کر رہا ہے۔‘

یہ عبوری معاہدہ جنگ کے مستقل خاتمے کے مقصد سے کیا گیا تھا۔

مجتبیٰ خامنہ ای نے کہا کہ امریکہ کو معلوم ہونا چاہیے کہ ایرانی قوم اور ’محاذِ مزاحمت‘ اس کے لیے ایسے اقدامات کی صلاحیت رکھتے ہیں جنہیں وہ کبھی فراموش نہیں کر سکے گا۔

امریکہ اور ایران کے درمیان حملوں کا تبادلہ جاری

دوسری جانب امریکہ اور ایران نے سنیچر بھی ایک دوسرے کے فوجی اور بنیادی ڈھانچے کو نشانہ بناتے ہوئے حملے کیے، جبکہ آبنائے ہرمز پر کشیدگی مزید شدت اختیار کر گئی ہے۔

خطے میں کئی روز سے جاری جوابی حملوں کے اس سلسلے میں توجہ کا مرکز اب آبنائے ہرمز پر کنٹرول بن چکا ہے۔ عبوری جنگ بندی کے خاتمے کے بعد اس جنگ کے اختتام کے آثار بھی دکھائی نہیں دے رہے، جس کا آغاز امریکہ اور اسرائیل نے چار ماہ سے زائد عرصہ قبل کیا تھا۔

امریکی سینٹرل کمانڈ (سینٹ کام) نے بتایا کہ ’مسلسل ساتویں رات کیے گئے حملوں میں ایران کے نگرانی کے مراکز، فوجی لاجسٹک انفراسٹرکچر، زیر زمین اسلحہ گوداموں اور بحری صلاحیتوں کو نشانہ بنایا گیا۔‘

ایرانی حکام کے مطابق حالیہ امریکی حملوں میں ایران میں درجنوں افراد ہلاک جبکہ سینکڑوں زخمی ہوئے ہیں۔ دوسری جانب امریکی فوج نے بھی تصدیق کی ہے کہ ان کارروائیوں کے دوران اس کے مزید کئی اہلکار زخمی ہوئے ہیں۔

ایران کے حملوں میں کویت کی آئل تنصیب اور بجلی گھر کو نقصان، متعدد افراد زخمی

کویت پیٹرولیم کارپوریشن نے کہا ہے کہ ملک کی ایک آئل تنصیب پر ایران کی جانب سے متعدد حملے کیے گئے جس کے نتیجے میں تنصیب کو شدید مالی نقصان پہنچا جبکہ متعدد افراد زخمی ہوئے۔

کویتی خبر رساں ایجنسی کے مطابق ایران نے ایک بجلی اور پانی کے پلانٹ کو بھی نشانہ بنایا جس کے باعث بجلی پیدا کرنے والے کئی یونٹس بند ہو گئے۔ یہ حملہ ایسے وقت میں کیا گیا جب ایک روز قبل بھی اسی نوعیت کا حملہ رپورٹ ہوا تھا۔

کویتی محکمہ فائر بریگیڈ کے مطابق حملے کے دوران آگ بجھانے میں مصروف ایک فائر فائٹر اور آئل تنصیب کا ایک ملازم زخمی ہوئے۔

کویت نے ایران پر شہری تنصیبات اور اہم بنیادی ڈھانچے کو نشانہ بنانے کا الزام عائد کرتے ہوئے کہا ہے کہ آئل تنصیب اور بجلی و پانی کے پلانٹ پر حملے شہریوں کی جان و مال کو خطرے میں ڈالنے کے مترادف ہیں۔

کویتی وزارت خارجہ نے اپنے بیان میں کہا کہ اہم تنصیبات کو بار بار نشانہ بنانا اس بات کی عکاسی کرتا ہے کہ شہری مراکز اور بنیادی ڈھانچے کو منظم انداز میں ہدف بنایا جا رہا ہے، جس سے شہریوں کی سلامتی کو شدید خطرات لاحق ہیں۔

دوسری جانب امریکہ نے جمعے کو مسلسل ساتویں رات ایران پر حملے کیے جبکہ ایران نے جوابی کارروائی میں جنگ میں براہ راست شریک نہ ہونے والے خلیجی ممالک کو بھی نشانہ بنایا۔ ایران کی جانب سے بحرین اور کویت پر ڈرون اور میزائل حملے کیے گئے جبکہ اردن میں واقع بعض فوجی اڈوں کو بھی نشانہ بنایا گیا۔