العنبرہ (عنبر) کھجور کا شمار مدینہ ریجن کی نایاب، مہنگی اور قدیم ترین کھجوروں کی اقسام میں ہوتا ہے۔ مملکت میں عجوہ کے بعد یہ سب سے زیادہ معروف ہے۔

ایس پی اے کے مطابق اس کی کٹائی رطب کے سیزن کے اختتام پر اگست اور ستمبر میں مدینہ اور اس کی کمشنریوں میں شروع ہوتی ہے۔

العنبرہ کھجور اپنی بیضوی شکل، بڑے سائز، گہرے سرخ رنگ، منفرد خوشبو اور کم شکر کی مقدار کی وجہ سے منفرد ہے۔ یہ خصوصیات اسے ایک اعلٰی معیار کی کھجوروں کی اقسام میں شامل کرتی ہیں۔

مدینے میں خریدار اور زائرین خاص طور پر ان کھجوروں کو پسند کرتے ہیں اور اسے تلاش کرتے ہیں۔

العنبرہ کی فصل کو مملکت میں کھجور کی نایاب فصلوں میں سے ایک سمجھا جاتا ہے کیونکہ اس کی کاشت مشکل ہے۔ اس کے بیجوں کی زیادہ قیمت اور سالانہ پیداوار کم ہے۔ 

العنبرہ کی دیکھ بھال میں احتیاط کی ضرورت ہوتی ہے۔ ایک کھجور کے درخت کی سالانہ پیداوار 70 کلو گرام سے زیادہ نہیں ہوتی۔

مدینہ ریجن میں کھجوروں کا شعبہ اپنی پیداوار کے تنوع، کثرت اور معیار کے حوالے سے نمایاں مقام رکھتا ہے۔ پورے خطے میں 26 ہزار سے زائد باغات ہیں جہاں 80 لاکھ سے زیادہ کھجور کے درخت موجود ہیں۔ ان باغات سے حاصل ہونے والی کھجوریں دنیا کے 60 ممالک کو برآمد کی جاتی ہیں۔