کاک پٹ میں پائلٹ لڑ پڑے، امارات سے اسرائیل جانے والی پرواز کا رخ تبدیل

متحدہ عرب امارات کے شہر دبئی سے اسرائیل جانے والی پرواز کے کاک پٹ میں دونوں پائلٹ آپس میں لڑ پڑے، جس کی وجہ سے نہ صرف جہاز کا رخ موڑنا پڑ گیا بلکہ کچھ دیر کے ایسے خدشات بھی پیدا ہوئے کہ جیسے جہاز کو ہائی جیک کر لیا گیا ہے۔

برطانوی خبر رساں ادارے روئٹرز کی رپورٹ میں العریبیہ کا حوالہ دیتے ہوئے بتایا گیا ہے کہ واقعہ بدھ کو فلائی دبئی کی معمول کی پرواز کے دوران پیش آیا۔

ابھی یہ امر واضح نہیں ہے کہ دونوں پائلٹس کے درمیان جھگڑا کس بات پر ہوا، تاہم طیارے سے ہنگامی سگنل بھیجا گیا جس کے بعد ممکنہ ہائی جیکنگ کے خدشے کے پیش نظر اسرائیل نے اپنے جنگی طیارے بھی روانہ کیے۔

اسرائیلی میڈیا نے سکیورٹی حکام کا حوالہ دیتے ہوئے واقعے کی تصدیق کی ہے اور کہا کہ اس کی اصل وجہ پائلٹوں کے درمیان جھگڑا ہی تھا جبکہ واقعے میں کوئی نقصان نہیں ہوا اور طیارے میں سوار تمام مسافر محفوظ رہے۔

ایک سرکاری عہدیدار جن کو واقعے کے حوالے سے فضائی حکام کی جانب سے بریف کیا گیا تھا، کا کہنا ہے کہ لڑائی کاک پٹ کے اندر شروع ہوئی جس میں دونوں پائلٹ ہی بظاہر ملوث تھے۔

اسرائیلی میڈیا کا کہنا ہے کہ دبئی سے تل ابیب جانے والے جہاز میں لڑائی کے دوران ایک پائلٹ نے دوسرے پر تیز دھار چیز سے وار کیے اور اس میں دونوں پائلٹ زخمی ہوئے جن کو ہسپتال منتقل کر دیا گیا ہے۔

رپورٹ کے مطابق پرواز ایف زیڈ 1073 کی جانب سے ایمرجنسی کوڈ ملایا گیا جس پر سکیورٹی نظام متحرک ہو گیا۔

بعدازاں جہاز کو سعودی عرب کی طرف موڑے جانے کی اطلاع سامنے آئی اور اس نے تبوک ایئر پورٹ پر لینڈنگ کی اور تمام مسافر محفوظ رہے ۔

مسافروں کا کہنا ہے کہ کاک پٹ میں بننے والی صورت حال پر سب پریشان ہو گئے تھے کہ ان لگ رہا تھا کہ وہ شاید زندہ نہ بچیں۔

’اندر سے چیخوں کی آوازیں آ رہی تھیں اور ہمیں لگ رہا تھا کہ جہاز گر جائے گا۔‘

فلائی دبئی کمپنی کی جانب سے کہا گیا ہے کہ مسافروں اور عملے کی حفاظت ہماری اولین ترجیح ہے۔

رپورٹس کے مطابق حکام کا کہنا ہے کہ واقعے کی تحقیقات شروع کر دی گئی ہیں۔