سعودی عرب نے یمنی حکومت کو بجٹ سپورٹ کی مد میں 224 ملین سعودی ریال سے زائد (60 ملین ڈالر) کی ایک نئی قسط فراہم کی ہے۔

یہ فنڈنگ سعودی عرب اور ایران نواز حوثیوں کے درمیان بڑھتی ہوئی کشیدگی کے دوران دی گئی ہے۔ حوثیوں نے سعودی شہروں اور توانائی کے بنیادی ڈھانچے پر حملے تیز کیے ہیں۔

یمن میں سعودی سفیر محمد الجابر نے جمعرات کو ایکس اکاؤنٹ پر پوسٹ میں لکھا ’یہ فنڈنگ  یمنی حکومت کی درخواست پر فراہم کی گئی۔ ایسے وقت میں جب حوثی ملیشیا کی جانب سے دہشت گردانہ حملے  یمنی عوام کے وسائل، املاک اور مفادات کو نشانہ بنا رہے ہیں۔‘

انہوں نے مزید کہا ’ سعودی ترقیاتی و تعمیر نو پروگرام برائے یمن کے ذریعے فراہم کی جانے والی اس گرانٹ کا مقصد حکومتی کیش فلو، مالیاتی پالیسی اور یمنی عوام کی قوت خرید کو سہارا دینا ہے۔‘

سعودی ترقی و تعمیر برائے یمن نے کہا کہ یہ اقدام سعودی عرب کی جانب سے یمنی عوام کے لیے جاری تعاون کا تسلسل ہے جس کا مقصد  قوت خرید کو مضبوط بنانا اور تجارتی مارکیٹوں کو متحرک کرنا ہے۔

اس سے یمنی حکومت کے آپریٹنگ اخراجات اور ملازمین کی تنخواہوں کی ادائیگی میں مدد ملے گی جس سے بجٹ خسارہ کم کرنے کے ساتھ مالیاتی نظام مستحکم ہوگا۔

اس سے قبل سعودی عرب نے یمنی سرکاری ملازمین کی تنخواہوں میں بڑے شارٹ فال پورا کرنے کے لیے 1.3 ارب ریال فراہم کیے تھے۔

 یہ اقدام یمن میں استحکام اور ترقی کو فروغ دینے کے لیے مملکت کے جاری اقدامات کا حصہ ہے۔