بیک یارڈ الٹرا میں پاکستان کی دوڑ ختم، جمال سعید کی 29 گھنٹوں میں 194 کلومیٹر دوڑ

پاکستان کی ٹیم نے بیک یارڈ الٹرا ورلڈ ٹیم چیمپیئن شپ 2026 میں مجموعی طور پر 234 لوپس مکمل کیے، جو تقریباً 1569 کلومیٹر بنتے ہیں، جبکہ ٹیم کے ایک رنر نے انفرادی طور پر 194 کلومیٹر سے زائد فاصلہ طے کیا۔

چیمپیئن شپ کے اعداد و شمار شیئر کرنے والی انسٹاگرام پوسٹ کے مطابق پاکستان کی جانب سے جمال سعید نے سب سے زیادہ 29 لوپس مکمل کیے، جو تقریباً 194.5 کلومیٹر بنتے ہیں، جبکہ محمد نے 28 لوپس مکمل کرکے تقریباً 187.8 کلومیٹر فاصلہ طے کیا۔

بیک یارڈ الٹرا عام میراتھن سے مختلف طرز کا مقابلہ ہے، جس میں شرکا کو ہر گھنٹے ایک مقررہ لوپ مکمل کرنا ہوتا ہے۔ 

ہر لوپ تقریباً 6.7 کلومیٹر طویل ہوتا ہے اور رنرز کو اسے ایک گھنٹے کے اندر مکمل کرنا ضروری ہوتا ہے۔

لوپ مکمل کرنے کے بعد شرکا اگلی دوڑ شروع ہونے تک آرام کر سکتے ہیں۔

اس مقابلے میں ہر ملک کی ٹیم کا مجموعی سکور اس کے تمام رنرز کے مکمل کردہ لوپس کو جمع کرکے بنایا جاتا ہے۔

مقابلہ اس وقت تک جاری رہتا ہے جب تک صرف ایک رنر باقی نہ رہ جائے، جو اکیلے ایک مزید لوپ مکمل کرکے فاتح قرار پاتا ہے۔

چیمپیئن شپ کے  34ویں یارڈ کے اعداد و شمار کے مطابق آسٹریلیا، بیلجیم، جاپان اور امریکہ کی ٹیمیں 510، 510 لوپس کے مجموعی سکور کے ساتھ برابر تھیں، جبکہ ان چاروں ٹیموں کے تمام 15، 15 رنرز اس وقت مقابلے میں موجود تھے۔

یہ اعداد و شمار مقابلے کے دوران ایک مخصوص وقت پر ریکارڈ کیے گئے تھے اور ریس آگے بڑھنے کے ساتھ ان میں تبدیلی آ سکتی تھی۔ اس لیے انہیں چیمپیئن شپ کے حتمی نتائج نہیں سمجھنا چاہیے۔

پاکستانی ٹیم کی دوڑ ختم ہونے کے باوجود دیگر ممالک کے رنرز کے درمیان مقابلہ جاری رہا، جہاں شرکا ہر گھنٹے مقررہ فاصلہ مکمل کرکے اپنی ٹیم کے مجموعی سکور میں اضافہ کرنے کی کوشش کر رہے تھے۔