سعودی اور اردنی ولی عہد کی ریاض میں ملاقات، حالیہ حوثی حملوں پر تبادلہ خیال

سعودی ولی شہزادہ محمد بن سلمان سے ریاض میں اردن کے ولی عہد شہزادہ الحسین بن عبداللہ ثانی نے ملاقات کی ہے۔

ایس پی اے کے مطابق پیر کو ہونے والی ملاقات میں دونوں شاہی شخصیات نے دیرینہ تعلقات کا جائزہ لینے کے ساتھ مختلف شعبوں میں تعاون کو وسعت دینے کے حوالے سے مشترکہ دلچسپی کے امور پر تبادلہ خیال کیا۔

اردن کے ولی عہد شہزادہ الحسین بن عبداللہ ثانی نے یمن میں حوثیوں کی جانب سے سعودی عرب کو نشانہ بنائے جانے والے حالیہ حملوں کی مذمت کی۔

انہوں نے مملکت کی جانب سے اپنی سلامتی، شہریوں اور رہائشیوں کےحوالے سے درپیش خطرات سے نمنٹے اور اپنے وسائل کے تحفظ کے لیےاٹھائے جانے والے تمام اقدامات کی مکمل سپورٹ کا عزم ظاہر کیا۔

اردنی ولی عہد نے شاہ عبداللہ ثانی کی جانب سے سعودی قیادت کو تہنیتی پیغام پہنچایا جس کے جواب میں سعودی ولی عہد نے اردن کے فرمانروا کے لیے نیک خواہشات کا پیغام دیا۔

ملاقات میں ریاض ریجن کے نائب گورنر شہزادہ محمد بن عبدالرحمن اور سعودی وزیر خارجہ شہزادہ فیصل بن فرحان بھی موجود تھے۔

اردن کے وفد میں نائب وزیراعظم و وزیر خارجہ ایمن الصفدی، چیئرمین جوائنٹ چیفس آف سٹاف میجرجنرل مجدی الحراسین اور ولی عہد کے دفتر کے ڈائریکٹر زید بقاعین شامل تھے۔