نظام پر شبہات بڑھ گئے ،سعد رفیق

لاہور...وزیر ریلوے خواجہ سعد رفیق نے کہا ہے کہ نوازشریف کی نااہلی اور بے نظیر قتل کیس کے نتائج نے نظام پر شبہات میں اضافہ کردیا۔ ٹوئٹر پر بیان میں انہوں نے کہا کہ عدلیہ بحالی تحریک کے نتیجے میں عدلیہ بحال کرائی مگر اس کا وقار اور آزادی بحال نہیں کروا سکے ۔ پرویز مشرف پاکستان کے نظام عدل سے زیادہ طاقتور ثابت ہوئے۔بےنظیر بھٹو، اکبر بگٹی،لال مسجد قتل عام اور ججز نظر بندی کے بڑے ملزم پرویز مشرف کے با ہر جانے کا کریڈٹ دھرنا دینے اور دلوانے والوں کوجاتا ہے۔ انہوںنے کہا کہ حصول انصاف کے لئے ورثا اور پیپلزپارٹی نے زبانی جمع خرچ کے سوا کچھ نہیں کیا۔انہوں نے کہا کہ توانا شفاف اور فعال جمہوریت کے قیام کے لئے اہم اسٹیک ہولڈرز نے اپنی ذمہ داری سے پہلو تہی کی ہے۔شفاف اور طاقتور جمہوری نظام کے لئے قومی مکالمہ نہ کیا گیا تو داخلی انتشار بڑھے گا۔سعد رفیق نے مزید کہا کہ بیرونی دشمنوں کی ناکامی کےلئے اندرونی مسائل بات چیت سے ہی حل کرنا ہوں گے۔