کسی بھی خطرے سے نمٹنے کیلئے تیار ہیں،جنرل باجوہ

راولپنڈی.. آرمی چیف جنرل قمر جاوید باجوہ نے کہا ہے کہ دہشت گردی کے خلاف جنگ میں پاکستان سے بڑھ کر کسی بھی ملک نے قربانیاں نہیں دیں۔ بدقسمتی سے بین الاقوامی برادری نے ہماری قربانیوں کو تسلیم نہیں کیا۔دہشتگردی کے خلاف جنگ کامیاب ہوگئی ہمارا دشمن خواہ چھوٹا ہو یا بڑا مہم جوئی کی صورت میں منہ توڑ جواب دیا جائے گا۔ آئی ایس پی آر کے مطابق پی اے ایف اصغرخان اکیڈمی میں پاسنگ آوٹ پریڈ سے خطاب کرتے ہوئے انہوں نے کہا کہ کسی کو اپنے ایکشن کی غلط تشریح نہیں کرنے دیں گے۔کسی بھی اندرونی و بیرونی خطرے سے نمٹنے کے لئے تیار ہیں۔ دشمن کو جارحیت کی صورت میں ناقابل تلافی نقصان پہنچے گا۔ ہمارا دشمن خواہ چھوٹا ہو یا بڑا مہم جوئی کی صورت میں منہ توڑ جواب دیا جائے گا۔انہوں نے کہا کہ پاکستان خطے میں امن کو فروغ دینا چاہتا ہے۔ امن و سلامتی کے قیام کے لئے پرعزم ہیں۔ امن کا قیام ہی پاکستان میں استحکام اور سلامتی کی ضمانت ہے۔انہوں نے کہاکہ پاکستان وہ واحد ملک ہے جس نے آپریشن ردالفساد کے تحت باقی ماندہ دہشتگردوں کے خاتمے کے لئے بھی اقدامات اٹھائے۔ پاک فضائیہ نے پاک، افغان سرحد کے قریب دہشتگردوں کی پناہ گاہوں اور تربیتی مراکز کو تباہ کرنے میں اہم کردار ادا کیا۔ فضائیہ کی بہترین کارکردگی کے باعث دہشت گردی کے خلاف جنگ میں کامیابی ملی۔