’سری دیوی تشریف لا رہی ہیں‘

دیپکا کے والد انڈیا کے معروف بیڈمنٹن کھلاڑی رہ چکے ہیں اور دیپکا خود بھی بیڈمنٹن کی قومی سطح پر کھلاڑی رہ چکی ہیں۔ فوٹو: اے ایف پی
گذشتہ کئی برسوں سے بالی وڈ میں بایوپک بنانے کا رجحان زور پکڑتا جا رہا ہے اور بات باکسر میری کوم سے شروع ہو کر انڈیا کے وزیر اعظم نریندر مودی تک جا پہنچی ہے لیکن اب انڈیا کی بیڈمنٹن چیمپیئن پی وی سندھو کی بایوپک بنانے کی تیاریاں شروع  ہو رہی ہیں۔
پی وی سندھو نے حال ہی میں ورلڈ چیمپیئن شپ میں طلائی تمغہ حاصل کیا ہے۔ جب ان سے یہی سوال پوچھا گیا تو انہوں نے بلا تکلف پدماوت کا تاریخی کردار ادا کرنے والی ہیروئن دیپکا پادوکون کا نام لیا۔
 

 بالی وڈ میں بایوپک کا رجحان میری کوم سے وزیراعظم مودی تک پہنچ گیا ہے، فوٹو: اے ایف پی

اگر کھیل، قد کاٹھی اور کئی دوسرے لحاظ سے بھی دیکھا جائے تو سندھو اور پادوکون میں بہت مماثلت ہے۔ شاید آپ کو یہ علم ہو کہ دیپکا کے والد پرکاش پادوکون انڈیا کے معروف بیڈمنٹن کھلاڑی رہ چکے ہیں جبکہ خود دیپکا بھی بیڈمنٹن کی قومی سطح کی اچھی کھلاڑی رہی ہیں۔
اس فلم کو اداکار سونو سود پروڈیوس کر رہے ہیں۔ جب ’ہندوستان ٹائمز‘ نے سندھو سے ان کے کردار ادا کرنے والی اداکارہ کے بارے میں پوچھا تو انہوں نے کہا: 'ان کا کردار یقیناً دیپکا ادا کریں گی۔ انہوں نے بیڈمنٹن کھیل رکھی ہے اور وہ اچھی اداکارہ بھی ہیں لیکن اس بارے میں فلم ساز کا فیصلہ حتمی ہو گا اور مجھے ان کے فیصلے پر اعتماد ہے۔'
جب سندھو سے ان کے کوچ اور سابق بیڈمنٹن کھلاڑی پولیلا گوپی چند کا کردار ادا کرنے کے بارے میں اداکار اکشے کمار کا نام لیا گیا تو انہوں نے کہا کہ اس کا انہیں کوئی اندازہ نہیں ہے۔

سری دیوی مادام تساؤ کی زینت بڑھائیں گی۔

جس رفتار سے مادام تساؤ عجائب گھر میں انڈین اداکار اور اداکاراؤں کے مجسمے لگائے جا رہے ہیں وہ دن دور نہیں جب وہاں وہ اکثریت میں نظر آنے لگيں گے۔
مادام تساؤ کے عجائب گھر میں تازہ مہمان انڈیا کی اپنے زمانے کی معروف اداکارہ سری دیوی ہیں۔
سری دیوی کا گذشتہ سال فروری میں دبئی میں پراسرار انداز میں انتقال ہو گیا تھا۔ جب مادام تساؤ عجائب گھر میں ان کے مومی مجسمے کو لگانے کی خبر آئی تو ان کے شوہر اور فلم ساز بونی کپور نے کہا کہ 'میں مادام تساؤ کا احسان مند ہوں کہ وہ میری بیوی سری دیوی کپور اور ان کی اداکاری کی عزت کر رہے ہیں۔' انہوں نے مزید کہا کہ وہ سنگاپور میں جب سری دیوی کے مجسمے کی نقاب کشائی ہو گی تو خود موجود ہوں گے۔ ان کے ساتھ ان کی بیٹی اور اداکارہ جھانوی کپور تو ہوں گی ہی۔
بونی کپور نے دو روز قبل جب سے ان کے مجسمے کی تصویر کی ایک ہلکی سی جھلک پیش کی ہے اس کے بعد ٹوئٹر پر 'سری دیوی لوز فار ایور' کا ہیش ٹیگ ٹرینڈ کر رہا ہے۔
سمیت ڈاگا نامی ایک ٹوئٹر صارف نے لکھا: 'مزید انتظار نہیں کر سکتا! انڈین سنیما کی کوئین، انڈین سنیما کی پہلی خاتون سپرسٹار، آخری ملکہ، پدم شری سری دیوی کل تشریف لا رہی ہیں۔'
سری دیوی کے موم کے مجسمے کی بدھ کو سنگاپور کی مادام تساؤ گلیلری میں رونمائی کر دی گئی ہے۔

اذان کا وطن پاکستان

جب سے عدنان سمیع کے بیٹے اذان سیمع نے اپنا وطن پاکستان بتایا ہے سوشل میڈیا میں یہ گرما گرم بحث کا موضوع بنا ہوا ہے۔
عدنان سمیع ایک عرصے سے انڈیا میں رہتے آئے ہیں اور اب وہ انڈیا کے شہری ہیں۔ وہ سوشل میڈیا بطور خاص ٹوئٹر پر سرگرم رہتے ہیں اور پاکستان انڈیا کی حالیہ تلخی میں وہ ہمیشہ انڈین پوزیشن کی حمایت کرتے نظر آئے ہیں۔
اب ان کے بیٹے اذان جو میوزک کمپوزر ہیں انھوں نے بی بی سی کے ایک انٹرویو میں کہا: 'میں نے اب تک کبھی اس بارے میں اس لیے بات نہیں کی کہ وہ میرے والد ہیں۔ میں ان کو پیار کرتا ہوں اور ان کا احترام کرتا ہوں۔ انہوں نے بعض فیصلے کیے کہ وہ کہاں رہنا چاہتے ہیں اور کس ملک کو اپنا وطن کہنا چاہتے ہیں۔ میں ان کے فیصلے کا احترام کرتا ہوں۔ اب میں جس ملک کو اپنا وطن کہنا چاہتا ہوں یہ میری پسند ہے اور میں نے پاکستان میں کام کرنا پسند کیا ہے۔'
انہوں نے مزید کہا: 'میں انڈیا میں پلا بڑھا، بطور خاص عنفوان شباب کا زمانہ وہاں گزارا لیکن اب پاکستان میرا وطن ہے۔ میں وہاں (انڈیا میں) پلا بڑھا ضرور ہوں لیکن مجھے لگتا ہے کہ پاکستان کی انڈسٹری میرا خاندان ہے۔'
خیال رہے کہ اذان سمیع کی والدہ اداکارہ زیبا بختیار بالی وڈ کی معروف فلم 'حنا' میں نظر آئی تھیں اور وہ پاکستان کی بھی معروف اداکارہ رہی ہیں۔ وہ عدنان سمیع کی پہلی اہلیہ تھیں۔
ٹوئٹر پر جاری جنگ میں کوئی اگر عدنان سمیع کو آئی ایس آئی کا ایجنٹ کہہ رہا ہے تو کوئی اذان سمیع کو انڈین خفیہ ایجنسی را کا ایجنٹ، جبکہ کئی لوگ انڈیا پاکستان کی پرانی چپقلش کہ اب ثابت ہو گیا کہ 'باپ باپ ہوتا ہے اور بیٹا بیٹا' کے حوالے سے ٹویٹ کر رہے ہیں۔

شیئر: