سرکار دے اتے نہ رہنا ۔۔۔

ریاست خود سوائے ستم  و کرم  کے کچھ ایجاد نہیں کر سکتی۔ فوٹو: اے ایف پی
’یہ مت پوچھو کہ ملک تمہارے لیے کیا کر سکتا ہے۔ یہ پوچھو کہ تم ملک کے لیے کیا کر سکتے ہو۔‘
مذکورہ بالا قول کسی کا بھی ہو مگر ہے بہت شاندار۔ کیونکہ یہ بات طے ہے کہ  ترقی یافتہ ریاست بھی اپنے تمام شہریوں کو یکساں سہولتیں فراہم نہیں کر سکتی۔ میں نے معیارِ زندگی کے عالمی جائزوں میں ہمیشہ اول یا دوم  آنے والے کینیڈا میں ٹورنٹو یونیورسٹی کے باہر نیٹیو انڈینز کو فٹ پاتھ پر سوتے یا کسی ستون کے سہارے بے سہارا بیٹھے دیکھا۔
مگر اس میں ریاست کا بھی کوئی قصور نہیں۔ ریاست بھلے جتنی بھی ایماندار، دلدار اور جذبہِ فلاح سے مالامال ہو اس کا ڈھانچہ کچھ اس طرح کا ہے کہ سو فیصد لوگوں کو آسودہ رکھنا ممکن نہیں۔ جو ریاستیں اپنے نوے فیصد تک لوگوں کو بھی آسودہ رکھ پا رہی ہیں اس کے پیچھے بھی کروڑوں لوگوں کی ایماندارانہ محنت ہے۔
ویسے بھی ریاست لوگوں کے اجتماعی فخر  کے اظہار کے سمبل کے سوا اور کیا ہے۔ یہ الگ بات کہ جب کسی ریاست کو کوئی استحصالی اقلیت یا سوٹڈ بوٹڈ چور یا ڈاکو ہائی جیک کرلیں تو وہی ریاست ایک مراعات یافتہ اقلیت کی جنت کے سوا کچھ نہیں رہتی۔ ایسے حالات میں لوگوں کو اپنے مسائل کے حل کے لیے ریاست کا انتظار کرنے کے بجائے اپنی زندگی میں خود کوئی بہتری لانے کے لیے سوچنا چاہیے۔

ریاست کی مشینری کا انتظار کرنے کے بجائے خود بھی کچھ کرنا چاہیے۔ فوٹو: اے ایف پی

جہاں ریاست کسی بھی خامی، غفلت یا  کم مائیگی کے سبب نہ پہنچ سکے وہاں سے انفرادی ذمے داری کا سفر شروع ہوتا ہے۔ مگر یہ بات کبھی بھی اکثریت کی سمجھ میں نہیں آتی ۔ اکثریت بیشتر وقت کسی معجزے، کرامت یا نجات دھندہ کا انتظار کرنے میں مرتی کھپتی رہتی ہے۔ البتہ اسی ریوڑ میں سے کچھ لوگ ذرا الگ ہٹ کر سوچتے ہیں تو پہلے پہل پاگل، سنکی اور پھر نجات دھندہ اور دیوتا کہلانے لگتے ہیں۔ یہ دنیا شاید ایسے ہی پاگلوں کے بل پر چل رہی ہے جنہوں نے کبھی ریاست  یا غیبی مدد کا انتظار نہیں کیا اور بساط بھر کر گذرے۔
آپ پہئیے ، چھاپے خانے، سلائی مشین، دخانی انجن، بلب، اینٹی بائیوٹک، ریڈیو، ٹی وی، کمپیوٹر، انٹرنیٹ، موبائیل فون، مصنوعی کھاد سمیت انسانی ارتقا و ترقی کا دھارا موڑنے والی ایک بھی ایسی ایجاد بتا دیں جو ریاستی سرپرستی میں ہوئی ہو۔ ریاست ایجادات و تحقیق کو اپنے اچھے برے مقاصد کے لیے استعمال تو کر سکتی ہے مگر خود سوائے ستم  و کرم  کے کچھ ایجاد نہیں کر سکتی۔
اس لایعنی اور طویل تمہید کے بعد آتے ہیں فرد کی طاقت کی جانب۔ یعنی ایک فرد جس کے پاس کوئی وسیلہ یا بہت زیادہ تعلیم  بھی نہ ہو وہ کیسے تبدیلی لا سکتا ہے۔ اپنے اندر چھپے ہوئے ایدھی، مدر ٹریسا اور روتھ فاؤ کو کیسے دریافت کر سکتا ہے۔ اب میں بات نہیں کروں گا ایمبولینس دادا کی کہانی سناؤں گا۔
کریم الحق عرف ایمبولینس دادا مغربی بنگال کے ضلع جلپائی گڑی کے دھالا باری گاؤں میں رہتا ہے۔ علاقے کی آبادی کا گذارہ چائے کے باغات میں مزدوری یا چھوٹی موٹی کسانیت پر ہے۔ کریم  بھی چائے باغ میں مزدوری کرتا ہے۔ اس کی تنخواہ پانچ ہزار  روپے ہے۔ گاؤں سے بنیادی مرکزِ صحت آٹھ کلومیٹر اور جلپائی گڑی ڈسٹرکٹ اسپتال پچاس کلومیٹر کے فاصلے پر ہے۔ شہر تک رسائی کے تمام راستے یا تو کچے یا پتھریلے یا جو پختہ ہیں ان میں بھی بڑے بڑے گڑھے ہیں۔ کسی حاملہ عورت کے لیے ایمبولینس کا شہر سے آنا ایک خواب ہے۔ آ بھی جائے تو پورا ایک دن لگتا ہے۔ لہذا اس کا آنا نہ آنا برابر ہے۔

ویسے بھی ریاست لوگوں کے اجتماعی فخر  کے اظہار کے سمبل کے سوا اور کیا ہے۔ فوٹو: اے ایف پی

سترہ برس پہلے کریم الحق کی ماں بیمار ہوئی اور اس سے پہلے کہ کریم اسے لے کر اسپتال پہنچ پاتا وہ راستے میں ہی دم توڑ گئی۔ اس دن کریم الحق نے عہد کیا کہ اب وہ کسی کو اس لیے نہیں مرنے دے گا کہ وہ اسپتال نہ پہنچ پایا۔ کچھ دن بعد چائے کے کھیت میں اس کا ساتھی مزدور عزیز اچانک چکرا کے گر پڑا۔ کریم نے باغ کے مینیجر سے کہا کہ اگر وہ اپنی موٹر سائیکل کی چابی دے دے تو میں عزیز کو اسپتال پہنچا سکتا ہوں۔ مینیجر نے پس و پیش کے بعد چابی دے دی اور کریم اپنے ساتھی کو بقول ڈاکٹروں کے بروقت اسپتال پہنچانے میں کامیاب ہوگیا۔ یہاں سے کریم الحق کو خیال آیا کہ موٹرسائیکل کو بھی تو بطور ایمبولینس استعمال کیا جا سکتا ہے۔ اس نے قرضے پر ایک موٹر سائیکل خریدی، فیصلہ کیا کہ آدھی تنخواہ اپنے اخراجات کے لیے اور آدھی ایمبولینس کے پٹرول کے لیے وقف کرے گا۔
اب تک کریم الحق اپنی موٹرسائیکل ایمبولینس سروس کے ذریعے اپنے اور اردگرد کے بیس دیہاتوں کے لگ بھگ  چھ ہزار مریضوں اور زخمیوں کو اسپتال تک پہنچا چکا ہے۔ ضلعی حکومت نے ایک بار اسے چند ہزار روپے دئیے اس کے سوا کوئی سرکاری امداد نہیں ملی۔ البتہ ریاست نے اسے بھارت کے اصلی ہیروؤں کی صف میں ضرور شامل کر لیا ہے۔ اربوں روپے کا کاروبار کرنے والے بجاج موٹرز نے حاتم طائی کی قبر پر لات مارتے ہوئے کریم الحق کی موٹرسائیکل ایمبولینس پر بارش سے بچاؤ کا کور اور دائیں بائیں دو آکسیجن سلنڈرز رکھنے کے پائیدان بنوا دیے۔
کریم الحق نے اس دوران ایک ڈاکٹر سے فرسٹ ایڈ کی ٹریننگ بھی لے لی تاکہ راستے میں یا کسی گھر میں ایمرجنسی کی صورت میں وہ بروقت مدد کر سکے۔ اپنی سالانہ چھٹی کریم الحق اردگرد کے جنگلوں میں بسنے والے قبائلیوں کے ساتھ گذارتا ہے اور جو فرسٹ ایڈ کی تربیت لینا چاہے اسے تربیت دیتا ہے۔ ایک مخیر نے اسے باقاعدہ ایمبولینس عطیہ کرنے کی بھی پیش کش کی  مگر کریم الحق کا کہنا ہے کہ چار پہیوں والی گاڑی کی اس علاقے کے ٹوٹے پھوٹے راستوں پر ہر جگہ رسائی نہیں ہو سکتی لہذا موٹرسائیکل ایمبولینس ہی زیادہ کارآمد ہے۔

ریاست کا ڈھانچہ کچھ اس طرح کا ہے کہ سو فیصد لوگوں کو آسودہ رکھنا ممکن نہیں۔ فوٹو: اے ایف پی

یہ بتائیے کہ اگر کریم الحق بھی کروڑوں دیگر کی طرح ریاست کا انتظار کرتا رہتا تو چھ ہزار میں سے کتنے مریض بروقت اسپتال پہنچ پاتے۔ آپ کا جو بھی پیشہ ہو، آپ کی جتنی بھی آمدنی ہو، آپ کے جتنے بھی زاتی مسائل ہوں۔ آپ چاہیں تو اس بوجھ  کے باوجود اپنی اور دوسروں کی زندگی میں تبدیلی لا سکتے ہیں۔
بات ہے آئیڈیے کی۔ بات ہے کریم الحق کی، ایدھی کی، سیلانی ٹرسٹ کی یا ان جیسے چھوٹے چھوٹے قصبہ در قصبہ ایدھیوں اور سیلانیوں کی۔ جنہوں نے آج تک کسی بی جے پی، تحریکِ انصاف سمیت کسی پارٹی کے منشور یا وعدے پر کان نہ دھرا۔ ان سرپھروں کو تو کسی لانگ مارچ یا آزادی مارچ کا حصہ بننے کی بھی فرصت نہیں۔

شیئر:

متعلقہ خبریں