غیر ملکیوں کو باہر نکال کر صحرا میں رکھیں: کویتی اداکارہ

کویت کی نامور اداکارہ حیاۃ الفہد کو غیر ملکی شہریوں کو کویت سے باہر نکالنے کے بیان پر شدید تنقید کا سامنا کرنا پڑ رہا ہے۔

71 سالہ اداکارہ حیاۃ الفہد نے ایک مقامی ٹی وی چینل کو انٹرویو میں کہا تھا کہ کورونا وائرس کے باعث پیدا ہونے والی صورتحال کے پیش نظر تارکین وطن کو ملک سے باہر نکال دینا چاہیے۔

انہوں نے مزید کہا کہ ’ہم تنگ آچکے ہیں۔ اگر ہم بیمار ہو گئے تو ہمارے لیے ہسپتال نہیں ہوں گے۔‘

حیاۃ الفہد نے کویت میں رہائش پذیر دوسرے ممالک کے شہریوں کے بارے میں سوال کیا کہ اگر ان کا اپنا ملک انہیں نہیں رکھنا چاہتا، تو کیا ہمیں ان سے نمٹنا چاہیے؟ 

’کیا مصیبت کے دوران لوگوں کو چلے نہیں جانا چاہیے۔‘  انہوں نے تارکین کو کویت سے بایر نکال کر صحرا میں رکھنے کی بھی تجویز دی۔

حیاۃ الفہد کویت کی نامور اداکارہ ہیں اور عربی ڈراموں کا ایک بڑا نام ہیں۔

اداکارہ نے واضح کیا کہ وہ انسانیت کے خلاف نہیں ہیں لیکن 'اس وقت ہم ایسے مرحلے سے گزر رہے ہیں کہ ہم تنگ آ چکے ہیں۔‘

اداکارہ کے اس بیان سے بیشتر ٹوئٹر صارفین نے اختلاف کرتے ہوئے انہیں تنقید کا نشانہ بنایا ہے۔

ایک ٹوئٹر صارف نے سوال اٹھایا کہ کیا بیرون ممالک رہنے والے کویتی شہریوں کے ساتھ بھی یہی سلوک ہونا چاہیے جو اداکارہ کویت میں رینے والے غیر ملکیوں کے لیے اپنانے کا مشورہ دے رہی ہیں۔

ایک اور صارف نے اداکارہ کے بیان کو بیوقوفانہ اور بے رحم قرار دیتے ہوئے کہا کہ کویت کی معیشت کا انحصار تارکین وطن پر ہے۔

کویت میں اب تک 317 افراد کورونا وائرس سے متاثر ہو چکے ہیں جبکہ کوئی اس وبا سے تاحال کوئی ہلاکت رپورٹ نہیں ہوئی۔

کویت کا نظام صحت کورونا وائرس کی وجہ سے مشکلات کا شکار ہے۔

مشرق وسطیٰ کے ممالک میں سے کویت نے کورونا وائرس پر قابو پانے کے لیے سخت اقدامات اٹھائے ہیں۔

کویت کی حکومت نے وائرس سے متاثرہ اپنے شہریوں اور غیر ملکیوں کا مفت اعلاج کرنے کا اعلان کیا تھا۔