بالی وڈ اداکار سشانت سنگھ راجپوت نے خودکشی کرلی

عرفان خان اور رشی کپور کے انتقال کے بعد بالی وڈ انڈسٹری ایک اور صدمے سے دوچار ہوگئی ہے۔ 'ایم ایس دھونی' اور 'پی کے' جیسی سپرہٹ فلموں میں بہترین اداکاری سے مداحوں کا دل جیتنے والے سشانت سنگھ راجپوت دنیا میں نہیں رہے۔

انڈیا کے ٹی وی چینل این ڈی ٹی وی کے مطابق بالی وڈ کے مشہور اداکار سشانت سنگھ راجپوت ممبئی میں اپنے گھر میں مردہ حالت میں پائے گئے ہیں۔

سرکاری ریڈیو چینل آل انڈیا ریڈیو نے ان کی خودکشی کی تصدیق کی ہے۔

سشانت باندرہ میں واقع اپنے گھر میں لاک ڈاؤن کے دوران اکیلے رہ رہے تھے۔ پولیس کو بتایا گیا ہے کہ 34 سالہ اداکار نے اپنے کمرے میں خود کو لٹکا کر خودکشی کی ہے۔

سشانت سنگھ کی پہلی فلم 'کائی پو چے' تھی مگر انہیں 'پی کے' فلم سے مقبولیت ملی جس میں انہوں نے سرفراز نامی نوجوان کا کردار نبھایا تھا جس کا ڈائیلاگ 'سرفراز دھوکہ نہیں دے گا' بہت مقبول ہوا تھا۔

سشانت آخری بار 2019 میں ریلیز ہونے والی فلم 'چھچھورے' میں نظر آئے تھے، یہ فلم مایوسی کا شکار ہو کر خودکشی کرنے والے نوجوانوں سے متعلق تھی۔

چھ روز قبل پیر کو سشانت سنگھ راجپوت کی سابق مینجر دیشا سالیان نے ممبئی میں ایک عمارت سے چھلانگ لگا کر خودکشی کرلی تھی۔ 

سشانت سنگھ نے ایک ہفتہ پہلے انسٹا گرام اکاؤنٹ پر اپنی والدہ کو یاد کرتے ہوئے ان کی تصویر شیئر کی تھی۔

بالی وڈ فنکار اور دیگر اہم شخصیات نوجوان اداکار کی موت پر افسوس کا اظہار کررہی ہیں۔ بالی وڈ کے ایکشن ہیرو اکشے کمار نے لکھا ہے کہ 'اس خبر نے مجھے صدمے سے دوچار کیا ہے اور میں کچھ کہنے کے قابل نہیں۔'

انہوں نے لکھا کہ 'مجھے یاد ہے کہ میں سشانت سنگھ راجپوت کو 'چھچھورے' میں دیکھ رہا تھا اور اپنے دوست ساجد کو بتا رہا تھا کہ میں نے اس فلم سے کتنا لطف اٹھایا اور یہ خواہش ظاہر کی کہ میں بھی اس فلم کا حصہ ہوتا۔ ایک بہت ہی باصلاحیت اداکار، خدا ان کے اہلخانہ کو صبر دے۔'

بالی وڈ اداکارہ انوشکا شرما نے لکھا کہ’ سوشانت اتنے جلدی چلے گئے وہ بہت کم عمر اور ذہین تھے مجھے یہ جان کر بہت افسوس ہوتا ہے کہ ہم ایسے ماحول میں رہتے ہیں جہاں  کسی کودر پیش مسائل میں ان کی مدد بھی نہیں کی جا سکتی۔

بالی وڈ اداکار سنجے دت نے معاملے پر افسوس کا اظہار کرنے کے لیے سوشل میڈیا کا رخ کیا تو اپنے پاس الفاظ نہ ہونے کا اعتراف کیا۔

سشانت کے اہلخانہ سے اظہار تعزیت کرتے ہوئے انہوں نے مزید لکھا 'سشانت سنگھ راجپوت کے انتقال کی خبر سن کر صدمے میں ہوں۔'

اداکار اور ہدایتکار فرحان اختر نے بھی افسوس کا اظہار کرتے ہوئے لکھا کہ 'سشانت کی موت سے میں دنگ رہ گیا ہوں۔ یہ بہت ہی افسوسناک ہے۔ ان کے خاندان والوں کے لیے میرا دل افسردہ ہے۔'

سابق انڈین کرکٹر وریندر سہواگ نے لکھا کہ 'زندگی بہت ناپائیدار ہے، ہم نہیں جانتے کہ کوئی کن مشکلات سے گزر رہا ہے۔'

انڈین کرکٹر ہربھجن سنگھ نے اس خبر پر غیریقینی کا اظہار کرتے ہوئے لکھا کہ 'برائے مہربانی مجھے بتائیں کہ یہ جھوٹی خبر ہے۔یقین نہیں آرہا کہ سشانت سنگھ اب نہیں رہے۔ بہت افسوسناک۔'

سوشل میڈیا پر سشانت سنگھ راجپوت کے مداح ان کی موت پر افسوس کا اظہار کرتے ہوئے ان کی یادگار فلموں کا تذکرہ کر رہے ہیں۔ ٹویٹر پر اس وقت سشانت سنگھ کے ہیش ٹیگ کے علاوہ depression# اور MentalHealthMatters# کے ہیش ٹیگ کے ساتھ تبصرے کیے جا رہے ہیں۔

بالی وڈ اداکارہ رچا چڈھا نے لکھا کہ 'خوشی پیسے، شہرت اور چیزوں سے نہیں ملتی۔ یہ ایک ایسی چیز ہے جو آپ کو خود ایک عادت کی طرح اپنانا پڑتی ہے خاص طور پر ہمارے شعبے میں۔ اگر ہم دباؤ کو برداشت کر سکیں۔'

فلورا ایلیکس نامی صارف نے لکھا کہ 'ڈپریشن حقیقی ہے اور اسے مدد کی ضرورت ہے۔ دیگر بیماریوں کی طرح ذہنی صحت سے متعلقہ مسائل بھی حقیقی ہیں اور اس میں شرمندگی کی کوئی بات نہیں۔ برائے مہربانی اپنا اور اپنے اردگرد لوگوں کا خیال رکھیں۔ انہیں بتائیں کہ آپ کو ان کا کتنا خیال ہے۔'