میکسیکو نے اٹلی کو پیچھے چھوڑ دیا

دنیا بھر میں عالمی وبا سے متاثرہ افراد کی تعداد بڑھ کر ایک کروڑ 29 لاکھ تک پہنچ گئی ہے جبکہ مجموعی اموات پانچ لاکھ 69 ہزار سے زیادہ ہیں۔

امریکہ کی جان ہاپکنز یونیورسٹی کے اعداد و شمار کے مطابق امریکی ریاستوں میں 33 لاکھ جبکہ برازیل میں 18 لاکھ 64 ہزار کورونا متاثرین ہیں۔ امریکہ کی 40 سے زائد ریاستوں میں کورونا کا پھیلاؤ جاری ہے۔

اے ایف پی کے مطابق امریکہ میں گذشتہ کئی روز سے یومیہ 60 ہزار سے زائد نئے کیسز رپورٹ ہو رہے ہیں۔

ملک میں ہلاکتوں کی تعداد ایک لاکھ 35 ہزار سے زائد ہے۔ برازیل دوسرے نمبر پر ہے جہاں اب تک 72 ہزار سے زیادہ اموات ہوئی ہیں۔

امریکہ کا پڑوسی ملک میکسیکو کورونا وائرس سے سب سے زیادہ متاثر ہونے والے ملکوں میں تیسرے نمبر پر آ گیا ہے۔

خبر رساں ادارے اے ایف پی کے مطابق میکسیکو کے محکمہ صحت کے جاری کردہ اعداد و شمار کا جائزہ لینے کے بعد معلوم ہوتا ہے کہ کورونا سے اموات میں میکسیکو نے اٹلی کو پیچھے چھوڑ دیا ہے۔

اے ایف پی کے مطابق میکسیکو کے محکمہ صحت کے حکام نے بتایا کہ ملک میں کورونا کے کل کیسز کی تعداد تین لاکھ تک پہنچ گئی ہے جبکہ وبا سے ہونے والی ہلاکتیں 35 ہزار سے بڑھ گئی ہیں۔ یہ اعداد و شمار صدارتی دفتر کے ٹوئٹر اکاؤنٹ پر جاری کیے گئے ہیں۔

واضح رہے کہ اٹلی میں کورونا سے ہونے والی اموات 34 ہزار 954 ہیں۔

ادھر جاپان میں دو امریکی فوجوں اڈوں میں وائرس کے پھیلاؤ کے بعد لاک ڈاؤن نافذ کیا گیا ہے۔ جاپان کے حکام نے امریکی فوج کی وائرس کے روک تھام کی کوششوں پر تنقید کی ہے۔

اے ایف پی کے مطابق جاپان کے جنوبی جزیرے پر ہزاروں امریکی فوجی قیام پذیر ہیں جہاں ڈیڑھ سو عام شہریوں میں کورونا کے کیسز سامنے آئے ہیں۔

دوسری جانب سپین میں کاتالونیا کی عدالت نے حکام کی جانب سے ریاست میں نافذ کیے گئے لاک ڈاؤن کے حکم کو کالعدم قرار دے دیا ہے۔

کورونا کے کیسز بڑھنے کے باعث دو لاکھ آبادی کے شہر میں 12 جولائی کو لاک ڈاؤن کا نفاذ کیا گیا تھا۔

اے ایف پی کے مطابق عدالتی فیصلے کے خلاف سپریم کورٹ میں اپیل کی جا سکتی ہے۔