حج 2020 کامیابی کے ساتھ اختتام کی طرف بڑھ رہا ہے۔ حجاج کے قافلے وقوف عرفہ اور مزدلفہ میں رات گزار نے کے بعد آج جمعہ 31 جولائی کو نماز فجر کے بعد منی پہنچ گئے۔
سماجی فاصلے اور احتیاطی تدابیر کے ساتھ جمرہ عقبہ (بڑے شیطان ) کی رمی کی پھر طواف افاضہ کے لیے مکہ مکرمہ روانہ ہوئے۔
طواف افاضہ بھی سماجی فاصلے کے ساتھ اطمینان اورسکون کے ساتھ مکمل کیا گیا۔
#يحدث_الآن pic.twitter.com/3gqGkELhhR
— وزارة الحج والعمرة (@HajMinistry) July 31, 2020
سعودی میڈیا کے مطابق حجاج نے رات مزدلفہ پہنچ کر مغرب اور عشا کی نمازیں ایک اذان دو اقامت سے مسجد المشعر الحرام میں سماجی فاصلے کے تحت ادا کیں۔ حجاج کی آمد سے قبل مسجد کی صفائی اوراسے سینیٹائز کیا گیا۔ مسجد میں سماجی فاصلے کی علامتیں بھی لگائی گئی تھیں۔ ہر گروپ کے لیے مسجد میں جگہ متعین تھی۔
حجاج نے مزدلفہ میں مغرب اور عشا کی نمازیں ایک ساتھ ادا کرنے کے بعد چند گھنٹے آرام کرکے رات کا باقی ماندہ حصہ عبادت میں گزارا۔
حجاج نے قربانی کے لیے کوپن خرید لیے تھے۔ سر کے بال منڈوانے یا ترشوانے کے خصوصی انتظامات منی میں پہلے ہی سے ہی ہیں۔ جس کے بعد حجاج احرام کی پابندی سے آزاد ہوگئے۔
العربیہ نیٹ کے مطابق جس سکون و اطمینان کے ساتھ حجاج کے قافلے جمعرات کو میدان عرفات سے مزدلفہ پہنچے اس کی نظیر پہلے نہیں ملتی- حاجیوں کی تعداد کم ہونے اور ان کے سفر کے بہترین انتظامات کی وجہ سے ایسا ممکن ہوسکا ہے۔
حجاج عرفات سے مزدلفہ کا سفر طے کرتے وقت ممنونیت کے جذبات سے سرشار تھے۔
وزارت حج و عمرہ نے مزدلفہ میں رات گزارنے کے لیے آرام گاہوں کا انتظام کیاتھا۔ جہاں سماجی فاصلے کی پابندی تھی۔ آرام گاہیں مزدلفہ کی مسجد المشعر الحرام کے قریب بنائی گئی تھیں۔
قبل ازیں میدان عرفات میں حج کا رکن اعظم ادا کرتے وقت حجاج ساتھ دعاؤں میں مشغول رہے۔ سورج غروب ہونے سے قبل میدان عرفات میں خشوع و خضوع کے ساتھ دعائیں کی جاتی رہیں۔
میدان عرفات میں حجاج نے ظہر اور عصر کی نماز ایک اذان دو اقامت کے ساتھ قصر ادا کی۔حج کا خطبہ سنا اور پیغمبر اسلام صلی اللہ علیہ وسلم کی پیروی میں سورج غروب ہونے تک وقوف کیا۔
میدان عرفات میں حجاج کی صحت و سلامتی کے لیے حفاظتی تدابیر اور صحت انتظٓامات کیے گئے تھے۔
دریں اثنا مکہ میونسپلٹی کے صفائی کارکن مشینوں کی مدد سے جمرات کے پل سمیت منی کے تمام علاقوں کی صفائی کر رہے ہیں۔
