Sorry, you need to enable JavaScript to visit this website.

یوم شہدائے پولیس: ’آپ کہیں زیادہ احترام کے لائق ہیں‘

پاکستان بھر میں پولیس کی خدمات کو خراج تحسین پیش کیا گیا (فوٹو کے پی پولیس)
پاکستان میں پولیس کے ان افسران اور جوانوں کو یاد کیا جا رہا ہے جو اپنے فرائض کی ادائیگی کے دوران جان کی قربانی دے کر اپنی یادیں پیچھے چھوڑ گئے ہیں۔
سوشل میڈیا پلیٹ فارمز پر اسلام آباد سمیت ملک کے تمام صوبوں سے تعلق رکھنے والے پولیس اہلکاروں و افسران کا تذکرہ کرنے والوں نے ’یوم شہدائے پولیس‘ کو ٹرینڈ لسٹ کا حصہ بنا ڈالا۔
اس گفتگو کا حصہ بننے والے سوشل میڈیا صارفین کے ساتھ ساتھ خود پولیس سے تعلق رکھنے والے اکاؤنٹس بھی اپنے بچھڑ جانے والے ساتھیوں کی یادیں تازہ کرتے دکھائی دیے۔
خیبرپختونخوا کے ضلع ایبٹ آباد کے ڈسٹرکٹ پولیس افسر (ڈی پی او) کی ایسی ہی ایک کوشش کو سوشل میڈیا پر خاصا سراہا گیا۔
ڈی پی او ایبٹ آباد یاسر آفریدی نے فرائض کی انجام دہی کے دوران جان قربان کرنے والے ایک پولیس کانسٹیبل سید ظفر رضا کی صاحبزادی کو پولیس موٹرسائیکل پر سوار کیا اور اسے خود چلا کر ڈسٹرکٹ پولیس آفس پہنچے۔
ایبٹ آباد کی مرکزی سڑک پر بھرپور پروٹوکول کے ساتھ سفر اور پھر پولیس آفس لائی گئی کمسن بچی سے متعلق سرگرمی کی ویڈیو اور تصاویر سوشل میڈیا پر نمایاں رہیں۔
 
پولیس کی خدمات اور اصلاحات کے حوالے سے سوشل میڈیا پر خاصے ایکٹو رہنے والے فرحان خان نے بچھڑ جانے والوں کا تذکرہ کیا تو لکھا ’آج کا دن امن اور تحفظ کی خاطر جانوں کی قربانی دینے والے پولیس کے سات ہزار ہیروز کے نام ہے‘۔

عامر زمان خیبرپختونخوا پولیس کے تذکرے کے ساتھ سامنے آئے تو لکھا ’کے پی پولیس نے سب سے زیادہ قربانیاں دی ہیں۔ ہم اپنی پولیس کے دل دکھا دینے والے نقصانات خصوصا بے دردی سے قتل کیے گئے طاہر داوڑ کو نہیں بھلا سکتے‘۔
 

راولپنڈی پولیس نے آج کے دن کی مناسبت سے سرگرمی کی تو بچھڑ جانے والے اہلکاروں و افسران کے اہلخانہ کے اعزاز میں تقریب کا اہتمام کیا۔
 

بڑے شہروں میں پولیس کے زیراہتمام خون کے عطیات کے لیے کیمپ بھی لگائے گئے۔ پشاور پولیس نے ایسی ہی سرگرمی کا انعقاد کیا تو اسے اپنے ٹوئٹر اکاؤنٹ پر شیئر بھی کیا۔
 

علی کیانی نامی صارف کچھ عرصہ قبل کراچی میں سٹاک ایکسچینج کی عمارت پر دہشت گرد حملے میں حملہ آوروں کو مارنے والے دو اہلکاروں خلیل اور رفیق کی تصویر والی ٹویٹ کے ساتھ گفتگو کا حصہ بنے تو لکھا ’سلام پولیس کو جو ہمارا آج اچھا بنانے کے لیے ان گنت کاوشیں کرتے ہیں، آپ کہیں زیادہ احترام کے لائق ہیں‘۔
 

سوشل میڈیا ٹرینڈ کا حصہ بننے والے صارفین کی اکثریت پولیس اہلکاروں کی خدمات کو یاد کرتے ہوئے انہیں خراج تحسین پیش کرتی رہی۔

شیئر: