برطانیہ کے لیے فلائٹ آپریشن: پی آئی اے کے انتظامات مکمل

پاکستان انٹرنیشل ایئرلائن نے برطانیہ کے لیے فلائٹ آپریشن بحال کرنے کے متبادل اتنظامات ترتیب دے دیے ہیں۔ 

انتظامات کے تحت پی آئی اے اور پرتگالی فضائی کمپنی کے مابین معاہدہ طے پا گیا ہے، تین سو سے زائد نشتوں والے جدید ایئر بس 330 A طیارے کے ذریعے پروازیں چلائی جائیں گی۔
 

پی آئی اے کے ترجمان عبداللہ خان کے مطابق برطانیہ آپریشن میں پی آئی اے کے سلاٹ اور کال سائن استعمال ہوگا۔

’ایئر بس 330 میں اکنامی اور بزنس کلاس میں جدید اور آرام دہ نشستیں ہیں۔‘

ترجمان کا مزید کہنا تھا کہ طیارے میں سماجی فاصلے کا خیال رکھا جائے گا۔

برطانیہ سے آپریشن 14 اگست کو شروع ہوں گے۔

پرواز پی کے 9702  مانچسٹر سے ڈھائی سو سے زائد مسافروں کو لے کر اسلام آباد روانہ ہو گی۔

15 اگست کو پرواز پی کے 9785 اسلام آباد سے لندن کے لیے روانہ ہو گی۔

ترجمان نے بتایا کہ ان براہ راست پروازوں پر بکنگ کا آغاز ہوگیا ہے اور پہلی پرواز کی تمام نشستیں فروخت ہو چکی ہیں۔

پی آئی اے ان پروازوں پر 45 کلو بیگج فی مسافر کو سہولت بھی مہیا کر رہا ہے۔

عبداللہ خان کا کہنا تھا کہ پی آئی اے کو درخواستیں موصول ہوئی ہیں کہ مانچسٹر سے زیادہ سے زیادہ پروازیں چلائی جائیں۔

قومی ایئرلائن کی پروازوں کی معطلی کے بعد دیگر ایئر لائنز نے کرائے غیر معمولی طور پر بڑھا دیے تھے۔

پی آئی اے کی پروازوں کے چلنے کے بعد کرائے واپس عام سطح پر آنا متوقع ہیں۔