امارات ، اسرائیلی معاہدے پر عالمی رہنماؤں کا خیر مقدم
امارات ، اسرائیلی معاہدے پر عالمی رہنماؤں کا خیر مقدم
جمعرات 13 اگست 2020 22:39
عالمی رہنماوں کا کہنا ہے کہ سہہ فریقی معاہدے کے مثبت نتائج برآمد ہونگے(فوٹو، ٹوئٹر)
اسرائیل اور متحدہ عرب امارات کے مابین معاہدے کا عالمی سطح پر خیر مقدم کیا گیا ہے۔ اس حوالے سے امریکی وزیر خارجہ مائیک پومپیو کا کہنا ہے کہ ’اسرائیل اور متحدہ عرب امارات کے مابین تعلقات استوار کرنے کےلیے معاہدہ درست سمت میں اہم قدم ہے‘۔
دوسری جانب فلسطینی صدر محمود عباس نے معاہدے کے حوالے سے فوری اجلاس طلب کرلیا ہے جس میں جمعرات کوامریکی صدر کی ثالثی میں طے کیے جانے والے معاہدے کا وسیع سطح پر جائزہ لیاجائے گا۔
معاہدے کے حوالے سے مصری صدر عبدالفتاح السیسی کا کہنا ہے کہ ’معاہدہ خوش آئند ہے ، مشرق وسطی میں قیام امن کی کوشش کرنے والوں کے اقدام کوسراہتا ہوں ‘
معاہدے کا جائزہ لینے کے لے فلسطینی صدر نے فوری اجلاس طلب کرلیا(فوٹو، سوشل میڈیا)
ویب نیوز ’سبق‘ کے مطابق مصری صدر نے معاہدے کے حوالے سے اپنے ٹوئٹ میں مزید کہا ’ سہہ فریقی معاہدے کے تمام پہلوں کا انتہائی باریک بینی سے جائزہ لیا جو امریکہ ، اسرائیل اور برادر ملک امارات کے مابین طے پایا ہے معاہدے سے اسرائیل کی جانب سے فلسطینی اراضی کو ضم کرنے کا عمل رک جائے گا‘
دریں اثنا ’عرب نیوز‘ کے مطابق برطانوی وزیر اعظم ’بورس جانسن‘ نے اس معاہدے کو ’بہت بڑی خوش خبری‘ قرار دیتے ہوئے اس کا خیر مقدم کیا۔
برطانوی وزیر اعظم نے اپنے ٹوئٹ میں کہا’ متحدہ عرب امارات اور اسرائیل کے تعلقات معمول پر لائے جانے کا فیصلہ بہت بڑی خوش خبری ہے، یہ میری دیرینہ خواہش تھی مغربی کنارے کی توسیع مزید آگے نہ بڑھےاور آج اس معاہدے سے وہ منصوبے رک گئے ، یہ معاہدے زیادہ پرامن مشرق وسطی کی جانب ایک خوش آئند قدم ثابت ہوگا‘۔
وائٹ ہاوس کے سینئر مشیر’جیرڈ کشنر‘ نے کہا ’ معاہدے کے بعد متحدہ عرب امارات خطے میں امریکہ کے قریب ترین اتحادیوں میں شامل ہوجائے گا‘۔
امریکی ڈیموکریٹک صدارتی امیدوار ’جو بائیڈن ‘ نے معاہدے کو مستحکم مشرق وسطی کی سمت ایک تاریخی اقدام قرار دیتے ہوئے کہا کہ’ اگر نومبر میں انتخابات جیت جاتے ہیں تو یہودی بستیوں کی توسیع کےلیے اسرائیلی اقدامت کی حمایت نہیں کریں گے‘۔
اقوام متحدہ کے سیکریٹری جنرل ’انتونیو گتریس ‘ نے کہا مشرق وسطی میں امن وسلامتی کےلیے جو بھی اقدام کیاجائے گا اس کا خیر مقدم کروں گا۔
دوسری جانب اماراتی نیوز ایجنسی ’وام ‘ کے مطابق یو اے ای کے وزیر مملکت برائے امور خارجہ ڈاکٹر انور قرقاش نے کہا ہے کہ ’ متحدہ عرب امارات ریاستی حل اور خطے میں قیام امن کےلیے اسرائیل کو فلسطینی علاقوں کے الحاق سے روکنے کی یقین دہانی حاصل کرنے میں کامیاب ہو گیا‘۔
اقوام متحدہ کے سیکٹری جنرل کا کہنا ہے کہ وہ قیام امن کے ہر اقدام کو سراہتے ہیں(فوٹو، ٹوئٹر)
ابوظبی کے ولی عہد اور یو اے ای کی مسلح افواج کے ڈپٹی سپریم کمانڈر شیخ محمد بن زاید آل نھیان کا کہنا تھا کہ اسرائیل کو فلسطینی علاقوں کے الحاق سے روکنا ایک اہم سفارتی کارنامہ ہے۔
امارات اور اسرائیل میں سفارتی تعلقات کی بحالی کا تاریخی معاہدہNode ID: 498571
