Sorry, you need to enable JavaScript to visit this website.

اسلام آباد میں جرائم پر امریکی سفارت خانے کا انتباہ

پولیس کے مطابق اسلام آباد میں سٹریٹ کرائم کی شرح میں واضح کمی آئی ہے (فوٹو: اے ایف پی)
اسلام آباد میں بڑھتے ہوئے جرائم پہ امریکی سفارتخانے نے اپنی شہریوں کو انتباہ جاری کیا ہے جبکہ پولیس نے کہا ہے کہ امریکی سفارتخانے کا بیان مفروضوں پر مبنی ہے۔
اپنی ویب سائٹس پر جاری ’سکیورٹی الرٹ‘ میں امریکی سفارت خانے کا کہنا ہے کہ اسے اسلام آباد میں جرائم میں حالیہ اضافے کی رپورٹ ملی ہے۔
’زیادہ تر واقعات اسلام آباد کے سیکٹر جی سکس، ایف سکس، ایف سیون، ایف ٹین، آئی نائن اور آئی ٹین میں ہوئے ہیں۔ ان سٹریٹ کرائمز میں رہزنی، مسلح ڈکیتی کے علاوہ موبائلز اور پرس چھیننے کی وارداتیں اور گاڑیوں کی چوری شامل ہے۔‘

 

الرٹ میں امریکی شہریوں سے کہا گیا ہے کہ اسلام آباد میں پولیس کی جانب سے جرائم کی اطلاع پر ایکشن کا وقت متعین نہیں ہے اس لیے شہریوں کو ہدایت کی جاتی ہے کہ مارکیٹس کے دورے کے دوران احتیاط کریں اور چوکنے رہیں۔
تاہم سفارت خانے نے واضح کیا ہے کہ اس کے اوقات کار اور آپریشن اسی طرح  برقرار رہیں گے۔
یاد رہے کہ عام طور پر امریکی سفارت خانہ شہریوں کو دہشت گردی یا احتجاج وغیرہ کی صورت میں انتباہ جاری کرتا رہا ہے مگر یہ کم ہی ہوتا ہے کہ اسلام آباد جیسے شہر میں سٹریٹ کرائمز کے حوالے سے انتباہ جاری کیا جائے۔
سفارت خانے کے انتباہ پر اسلام آباد پولیس کے ترجمان نے وضاحت جاری کرتے ہوئے کہا ہے کہ امریکن سفارتخانے کا بیان مفروضوں پر مبنی ہے۔

پولیس کے مطابق جن علاقوں کا ذکرکیا گیا ہے ان میں ایسا کوئی وقوعہ پیش نہیں آیا (فوٹو: اے ایف پی)

 ان کے مطابق بیان میں جن علاقوں کا ذکرکیا گیا ہے ان میں ایسا کوئی وقوعہ پیش نہیں آیا۔
اسلام آباد پولیس امریکن سفارتخانے کے اس بیان کی سختی سے تردید کرتی ہے۔ ترجمان کا کہنا تھا کہ اسلام آباد میں گذشتہ سالوں کی نسبت سٹریٹ و دیگر سنگین نوعیت کے جرائم کی شرح میں واضح کمی آئی ہے۔

شیئر: