اسرائیل کی قطر کو امریکی جہاز فروخت کرنے کی مخالفت

اسرائیل کے وزیر انٹیلی جنس نے خطے میں اسرائیلی فوج کی برتری برقرار رکھنے کے بارے میں بات کی ہے اور کہا ہے کہ اسرائیل امریکہ کی طرف سے ایف 35 جنگی طیارے قطر کو فروخت کرنے کی مخالفت کرے گا۔

عرب نیوز کے مطابق وزیر انٹیلی جنس ایلی کوہن سے اتوار کو اسرائیلی آرمی ریڈیو پر برطانوی خبر رساں ادارے روئٹرز کی ایک رپورٹ کے بارے میں پوچھا گیا جو کہ قطر کی امریکہ کو بھیجی گئی ایف 35 جنگی طیارے خریدنے کی درخواست سے متعلق تھی۔

ان سے پوچھا گیا کہ آیا اسرائیل ان طیاروں کی فروخت کی مخالفت کرے گا۔ اس پر ایلی کوہن کا کہنا تھا کہ 'جواب ہاں ہے۔ خطے میں ہماری سکیورٹی اور فوجی برتری ہمارے لیے سب سے اہم ہے۔ ہمارا خطہ ابھی تک سوئٹزرلینڈ میں تبدیل نہیں ہوا ہے۔'

واضح رہے کہ قطر کی امریکہ کو بھیجی جانے والی درخواست امریکہ اور متحدہ عرب امارات کی اگست میں ہونے والی ڈیل کے بعد بھیجی گئی ہے۔

امریکہ نے قطر کو ایف 35 طیارے فروخت کرنے کے بارے میں سوچنے پر رضامندی ظاہر کہ تھی۔

یہ امریکہ کی جانب سے متحدہ عرب امارات اور اسرائیل کے ساتھ کیے جانے والے ابراہم اکارڈ کی سائیڈ ڈیل کے طور پر کی گئی تھی۔

ابراہم اکارڈ متحدہ عرب امارات اور اسرائیل کے درمیان سفارتی تعلقات معمول پر لانے کا معاہدہ ہے۔