Sorry, you need to enable JavaScript to visit this website.

جدہ میں موسلادھار بارش کا امکان، بلدیہ کی تیاریاں مکمل

’دوپہر کے بعد اور عصر کے قریب سمندری بادل جدہ پہنچ جائیں گے جن کے باعث گرج چمک کے ساتھ بارش ہوگی‘ (فوٹو: طقس العرب)
متوقع بارش اور موسمی تغیر کے باعث جدہ سمیت تمام ساحلی علاقوں میں بلدیہ نے ہنگامی بنیادوں پر تیاری کر رکھی ہے۔
سبق ویب سائٹ کے مطابق جدہ میونسپلٹی نے شہر کی تمام شاہراہوں کے علاوہ انڈر پاسز پر مستعد اہلکار اور صفائی عملہ متعین کر رکھا ہے جس نے کل رات سے ڈیوٹی سنبھال لی ہے۔
بلدیہ نے کہا ہے کہ ’ہنگامی حالت کا اعلان کر دیا گیا ہے جس کے تحت تمام اہلکاروں اور صفائی عملے کی چھٹیاں منسوخ کردی گئی ہیں‘۔
’شہر کی تمام شاہراہوں اور سرنگوں میں صفائی عملہ تعینات ہے جبکہ پانی صاف کرنے کے آلات تیار کر لیے گیے ہیں‘۔
ادھر اللیث میونسپلٹی نے بھی موسلادھار کے باعث ایمرجنسی کا اعلان کر دیا ہے۔
اللیث میونسپلٹی نے کہا ہے کہ ’تین ایمرجنسی ٹیمیں تشکیل دی گئی ہیں جنہیں شہر کے مختلف مقامات متعین کر دیا گیا ہے‘۔
’50 نگرانوں کے ساتھ 150 صفائی کارکن مستعد ہیں جن کے زیر استعمال 27 آلات ہیں‘۔
دریں اثنا محکمہ موسمیات نے کہا ہے کہ ’بحیرہ احمر سے اٹھنے والے گھنٹے بادل سعودی عرب کے ساحلی علاقوں میں داخل ہونا شروع ہوگیے ہیں‘۔
’جدہ میں آج دوپہر کے بعد سمندر سے آنے والے بادل داخل ہونا شروع ہوں گے جن کے باعث تیز بارش کی توقع ہے‘۔
ادھر طقس العرب ویب سائٹ نے کہا ہے کہ ’موسمی نقشوں کا جائزہ لینے سے معلوم ہوا ہے کہ آج صبح سے بحیرہ احمر سے آنے والے بادل جدہ کی طرف بڑھ رہے ہیں‘۔
’دوپہر کے وقت یہ بادل ساحلی علاقوں میں پہنچیں گے جبکہ اس وقت بارش کا آغاز ہوگا‘۔
’دوپہر کے بعد اور عصر کے قریب سمندری بادل مکمل طور پر جدہ پہنچ چکے ہوں گے جن کے باعث شہر میں موسلادھار اور گرج چمک کے ساتھ بارش ہوگی‘۔

شیئر: