’حوثیوں کے حملے بین الاقوامی قوانین کی خلاف ورزی‘

متحدہ عرب امارات نے ایرانی حمایت یافتہ حوثی ملیشیا کی جانب سے سعودی عرب کے شہر خمیس مشیط میں شہریوں اور شہری تنصیبات کو نشانہ بنانے کی کوشش کی شدید مذمت کی ہے۔

امارات کی سرکاری خبر رساں ایجنسی وام  کے مطابق امور خارجہ اور بین الاقوامی تعاون کی وزارت کے ایک بیان میں کہا کہ ’حوثیوں کے منظم دہشتگردانہ حملے بین الاقوامی قوانین اور اصولوں کی خلاف ورزی ہیں۔

وزارت نے عالمی برادری پر زور دیا کہ وہ ان متواتر کی جانے والی کارروائیوں کو روکنے کے لیے فوری اور فیصلہ کن موقف اپنائے جس سے سعودی عرب کی سلامتی اور استحکام کو خطرہ ہے۔

بیان میں اس بات پر بھی زور دیا گیا کہ’ حالیہ دنوں میں ان حملوں میں مسلسل اضافہ ہورہا ہے جو خطے کی سلامتی اور استحکام کو خطرے میں ڈالنے کے مترادف ہے‘۔

وزارت خارجہ نے دہشتگردانہ حملوں پر سعودی عرب کے ساتھ  مکمل یکجہتی اور برادر ملک کی سلامتی، استحکام اور اس کے شہریوں اور رہائشیوں کی حفاظت کو درپیش تمام خطرات کے خلاف اپنے موقف کا اعادہ کیا ہے۔

بیان میں اس بات پر زور دیا گیا کہ’ متحدہ عرب امارات اور سعودی عرب کی سیکورٹی ناقابل تقسیم ہے۔ سعودی عرب کو درپیش کسی بھی خطرے کو امارات اپنی سلامتی اور استحکام کے لیے خطرہ سمجھتا ہے۔