کورونا کے نئے کیسز مسلسل 500 سے زیادہ، سات اموات

سعودی عرب میں کورونا کے نئے کیسز اتوار کو تیسرے دن بھی 500 سے زیادہ سامنے آئے ہیں جبکہ ایکٹیو کیسز میں بھی اضافہ ہو رہا ہے۔

یاد رہے کہ مملکت میں کورونا کے یومیہ نئے کیسز سو سے بھی کم آرہے تھے۔ چھ  ماہ بعد اب نئے کیسز دوبارہ بڑھ رہے ہیں۔

سبق نیوز نے وزارت صحت کی جانب سے جاری بیان کے حوالے سے بتایا کہ ’اتوار کو گذشتہ 24 گھنٹوں کے دوران کورونا کے 531 نئے مریض سامنے آئے جبکہ 389 افراد وائرس سے صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 7 مریض چل بسے، جس کے بعد مرنے والوں کی تعداد چھ  ہزار 650 ہو گئی ہے۔‘

وزارت کا کہنا ہے کہ ’مملکت میں کورونا کے ایکٹیو کیسز کی تعداد چار ہزار 728 ہو گئی ہے جن میں سے 638 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق سب سے زیادہ مریض ریاض ریجن میں سامنے آئے، جن کی تعداد 221 ہے جبکہ  الشرقیہ میں 105 افراد میں وائرس کی تصدیق ہوئی ہے۔

مکہ ریجن میں 99، مدینہ منورہ ریجن میں 27، القصیم ریجن میں 22، عسیر ریجن میں 14، حائل ریجن میں 13، تبوک ریجن میں 8 ، الجوف ریجن میں چھ ، جازان ریجن اور الحدود الشمالیہ ریجن میں پانچ، پانچ، نجران ریجن میں چار جبکہ الباحہ ریجن میں دو مریض سامنے آئے ہیں۔

اب تک تین لاکھ 88 ہزار 325 افراد میں کورونا وائرس کی تصدیق ہو چکی ہے جن میں سے تین لاکھ 76 ہزار 947 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘