منموہن سنگھ کورونا کا شکار: ’جلد صحت یابی کے لیے دعاگو‘

پاکستان کے وزیراعظم عمران خان نے سابق انڈین وزیراعظم من موہن سنگھ کے کورونا میں مبتلا ہونے پر افسوس کا اظہار کرتے ہوئے ان کی صحت یابی کی دعا کی ہے۔

منگل کو اپنی ٹویٹ میں عمران خان نے لکھا کہ ’سابق انڈین وزیراعظم من موہن سنگھ کی کورونا سے جلد صحت یابی کے لیے دعا گو ہوں۔‘

من موہن سنگھ پیر کے روز کورونا کا شکار ہوئے اور ان کو دہلی کے اے آئی ایم ایس کے ٹراما سینٹر میں داخل کرایا گیا ہے۔ 88 سالہ منموہن سنگھ کو بخار کی شکایت تھی جب ان کا کورونا کا ٹیسٹ کیا گیا تو وہ مثبت آیا۔

خیال رہے کہ اس وقت انڈیا کورونا کی تیسری لہر کی لپیٹ میں ہے اور گذشتہ چند روز میں کئی اہم شخصیات اس کا شکار ہو چکی ہیں۔

منگل کے روز انڈین وزیراعظم نریندر مودی نے قوم سے خطاب کرتے ہوئے عوام کے جذبے کو سراہا کہ ’قوم نے وبا کا تحمل سے مقابلہ کیا۔‘

تاہم انہوں نے ملک گیر لاک ڈاؤن کو خارج از امکان قرار دیا۔ ان کا یہ بھی کہنا تھا کہ ’حکومت ایک سال سے کوشش کر رہی ہے کہ کم سے کم وقت میں زیادہ سے زیادہ شہریوں کو کورونا ویکسین لگائی جائے۔‘

جان ہاپکنز یونیورسٹی امریکہ کے اعداد و شمار کے مطابق کورونا وائرس سے انڈیا میں اب تک ایک کروڑ 53 لاکھ 21 ہزار سے زائد افراد متاثر ہو چکے ہیں، جبکہ ایک لاکھ 80 ہزار سے زائد ہلاکتیں ہوئی ہیں۔

یاد رہے کہ انڈیا امریکہ کے بعد دنیا میں کورونا سے متاثر ہونے والا دوسرا بڑا ملک ہے۔