کیا واقعی حکومت پاکستان وقار ذکا کی خدمات لینے جا رہی ہے؟

معروف ٹی وی میزبان اور ’سوشل میڈیا سینسیشن‘ مانے جانے والے وقار ذکا اکثر سماجی رابطے کی ویب سائٹ پر اپنے الگ انداز کی وجہ سے ہمیشہ موضوع بحث بنے رہتے ہیں۔

ان کی حالیہ ٹویٹ کے باعث ایک مرتبہ پھر ان کا نام  ٹوئٹر ٹرینڈز میں ٹاپ پر ہے۔

اتوار کے روز ٹوئٹر پر وقار ذکا نے نوٹی فیکیشن شیئر کرتے ہوئے صارفین کو آگاہ کیا کہ ’حکومت پاکستان نے کرپٹو کرنسی کے حوالے سے میری خدمات حاصل کرنے کے لیے باقاعدہ طور پر مجھے بھرتی کر لیا ہے اور میں نے اس عہدے پر کام کرتے ہوئے تمام خدمات مفت فراہم کروں گا۔‘

یہ ٹویٹ منظرعام پر آتے ہی سوشل میڈیا صارفین کی جانب سے مختلف قسم کی ٹوئٹس کا ایک نہ رکنے والا سلسلہ شروع ہوگیا۔

ٹوئٹر صارف اظہر مشوانی نے لکھا کہ ’نوٹیفیکیشن کے مطابق آپ کو فروری میں خیبر پختونخوا حکومت کے سائنس و ٹیکنالوجی ڈیپارٹمنٹ کی کمیٹی کا حصہ بنایا گیا ہے۔ آپ کو حکومت پاکستان نے ماہر کے طور پر بھرتی نہیں کیا۔‘

ٹوئٹر صارف محمد قریشی نے شیئر کی جانے والی تصویر پر درج تاریخ پر اعتراض اٹھاتے ہوئے کہا کہ ’اس نوٹی فیکیشن پر 4 فروری کی تاریخ لکھی ہوئی ہے اور اس کمیٹی کے چیئرمین ضیا بنگش چند ماہ پہلے اپنے عہدے سے مستعفی ہو چکے ہیں تو کیا اس حساب سے یہ نوٹی فیکیشن اب بھی ٹھیک تصور کیا جائے گا؟

دوسری جانب صارفین وقار ذکا سے پرانے نوٹی فیکیشن کو دیر سے شیئر کرنے کی شکایت بھی کرتے رہے۔

ٹوئٹر صارف ذوالفقار نے نوٹی فیکیشن کی تاریخ پر تبصرہ کرتے ہوئے لکھا کہ ’یہ چار فروری کا نوٹی فیکیشن آج کیوں پوسٹ کر رہا ہے؟

ٹوئٹر صارف عدیل شیخ نے لکھا کہ ’سر آگر آپ غور سے دیکھیں تو یہ نوٹی فیکیشن حکومت پاکستان نہیں بلکہ خیبر پختونخوا حکومت کی جانب سے جاری کیا گیا ہے اور ایسی کوئی کمیٹی حکومت پاکستان کی جانب سے نہیں بنائی گئی۔