سعودی ولی عہد سے وزیراعظم شہباز شریف کا رابطہ، مملکت سے مکمل یکجہتی کا اظہار

پاکستان کے وزیراعظم شہباز شریف نے سعودی عرب کے ساتھ مکمل یکجہتی کا اظہار کرتے ہوئے کہا ہے کہ بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے۔

وزیراعظم آفس سے جاری کردہ بیان کے مطابق بدھ کی شام کو وزیراعظم نے سعودی عرب کے ولی عہد و وزیراعظم شہزادہ محمد بن سلمان سے ٹیلیفون پر گفتگو کی۔

گفتگو کے دوران وزیراعظم شہباز شریف نے خادمِ حرمینِ شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے اپنے احترام اور نیک تمناؤں کا اظہار کیا۔

انہوں نے پاکستان کے لیے ولی عہد شہزادہ محمد بن سلمان کی محبت، خلوص اور گرمجوشی پر ان کا شکریہ ادا کیا۔

دونوں رہنماؤں نے اس امر کا اعادہ کیا کہ حالیہ مہینوں میں نئی بلندیوں کو چھونے والے دیرینہ اور برادرانہ تعلقات کو مزید مضبوط کیا جائے گا۔

بیان کے مطابق دونوں رہنماؤں نے علاقائی صورتحال اور موجودہ پیش رفت پر بھی تبادلہ خیال کیا۔

وزیراعظم نے مختلف چیلنجز کے تناظر میں امتِ مسلمہ کے درمیان اتحاد اور ہم آہنگی برقرار رکھنے کی ضرورت پر زور دیا۔

مملکتِ سعودی عرب کے ساتھ پاکستان کی مکمل یکجہتی کا اظہار کرتے ہوئے وزیراعظم شہباز شریف نے کہا کہ ’بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے۔‘

بیان کے مطابق ولی عہد شہزادہ محمد بن سلمان نے ٹیلیفونک رابطے پر وزیراعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کی مملکت کی خواہش کا اعادہ کیا۔ انہوں نے آئندہ برس پاکستان کا سرکاری دورہ کرنے کی خواہش کا بھی اظہار کیا۔

خیال رہے کہ پاکستان نے یمن میں تشدد کی لہر دوبارہ اٹھنے پر پر گہری تشویش کا اظہار کیا ہے۔

بدھ کو ہی پاکستان کی وزارت خارجہ کی جانب سے جاری بیان میں کہا گیا کہ پاکستان یمن کی وحدت اور علاقائی سالمیت کے ساتھ ساتھ ملک میں پائیدار امن اور استحکام کے قیام کے لیے کی جانے والی تمام کوششوں کی بھرپور حمایت کا اعادہ کرتا ہے۔

بیان میں کہا گیا کہ ’پاکستان مملکتِ سعودی عرب کے ساتھ مکمل یکجہتی کا اظہار کرتا ہے اور مملکت کی سلامتی کے لیے اپنے عزم کی توثیق کرتا ہے۔‘