سعودی عرب میں37 ملین برس قدیم وہیل کا ڈھانچہ دریافت

 سعودی عرب میں جیالوجیکل ٹیم نے مملکت کے شمالی پہاڑی علاقے میں وہیل کا ڈھانچہ دریافت کیا ہے جو 37 ملین برس پرانا ہے۔ ماہرین کا کہنا ہے کہ نایاب وہیل کا ڈھانچہ مکمل ہے۔ 

ویب نیوز سبق نے جیالوجیکل سروے ٹیم کے سربراہ انجینئیرعبداللہ الشمرانی کے حوالے سے مزید کہا ہے کہ مملکت کے شمالی علاقے کی القریات کمشنری کے مغربی جانب ’الحدیثہ ‘ قصبے کے قریب پہاڑی سلسلے میں 37 ملین برس قدیم وہیل کا ڈھانچہ ملا ہے تاہم ماہرین اس بارے میں مزید تحقیق کررہے ہیں۔ 

جیالوجیکل ٹیم کے سربراہ کا مزید کہنا تھا کہ ابتدا میں وہیل کی کچھ باقیات ہی دریافت ہوئی تھیں مگر اب تقریبا اس کا مکمل ڈھانچہ برآمد ہوگیا ہے ۔ 

ماہرین کا کہنا ہے کہ وہیل کی عمر 37 ملین برس ہے جس کا اندازہ اس کی باقیات اور اطراف میں ملنے والے چٹانی پتھروں کا تجزیہ کرنے سے لگایا جاتا ہے۔