عازمین حج کی مکہ آمد اور منی روانگی کے لیے تیاریاں مکمل

سعودی وزارت حج و عمرہ نے اس سال عازمین حج کے استقبال کے لیے مکہ مکرمہ میں چار سینٹر تیار کیے ہیں۔ مسجد الحرام جانے سے قبل حجاج کرام کا النواریۃ، الزایدی، الشرائع اور الھدا میں خیر مقدم کیا جائے گا۔  خصوصی حفاظتی تدابیر اختیار کی جائیں گی۔ 

ایس پی اے کے مطابق نائب وزیر حج و عمرہ ڈاکٹر عبدالفتاح مشاط نے بتایا کہ وزارت نے استقبالیہ مراکز میں عازمین کے استقبال کے تین طریقہ کارمتعین کیے ہیں۔

پہلا یہ ہے کہ جو عازمین حج کمپنیوں کے ساتھ تعاون سے وزارت کی منظور شدہ بسوں سے پہنچیں گے۔ ان کے اجازت نامے چیک کیے جائیں گے۔ سمارٹ کارڈ  ’شعائر‘ کی ریڈنگ کی جائے گی پھر انہیں بسوں سے مسجد الحرام پہنچایا جائے گا جہاں وہ طواف قدوم کریں گے جبکہ بسیں ان کا سامان لے کر خیمے کا رخ کریں گی۔

دوسرا طریقہ کار جو عازمین حج کمپنیوں کی بسوں سے استقبالیہ مرکز پہنچیں گے ان کی خیر مقدمی کارروائی مرکز میں ہوگی پھر انہیں مقررہ بسوں سے مسجد الحرام لے جایا جائے گا۔

تیسرا طریقہ کار، پرائیویٹ گاڑیوں سے انفرادی شکل میں آنے والے عازمین کے حوالے سے ہے۔ ان کا سامان کمپنی کے حوالے کیا جائے گا۔ انہیں مقررہ بسوں سے مسجد الحرام لے جایا جائے گا جہاں وہ طواف قدوم کریں گے۔ ان کا سامان متعلقہ کمپنی خیمے میں پہنچائے گی۔

ڈاکٹر مشاط نے بتایا کہ  مکہ مکرمہ سے حج کرنے والے طواف قدوم نہیں کریں گے وہ مقررہ وقت پر استقبالیہ مراکز پہنچیں گے جہاں سے انہیں ان کے سامان کے ساتھ منی پہنچا دیا جائے گا۔

 استقبالیہ  مراکز میں عازمین کے خیر مقدم کا آغاز 7 اور 8 ذی الحجہ کو ہوگا۔ اس حوالے سے تمام حجاج کو قافلوں کے سکیم پروگرام سے آگاہ کردیا جائے گا ہر 20 حاجی پر ایک ہیلتھ کمانڈر تعینات ہوگا۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں