کورونا ویکسین کی دونوں خوراکیں لگوانے والے مقیم غیر ملکیوں کو سعودی عرب آنے کی اجازت

سعودی عرب نے کورونا ویکسین کی دونوں خوراکیں لگوانے والے مقیم غیر ملکیوں کو مملکت آنے کی اجازت دے دی ہے۔

سفیر پاکستان لیفٹیننٹ جنرل ریٹائرڈ بلال اکبر نے اردو نیوز سے گفتگو کرتے ہوئے تصدیق کی کہ ’پابندی والے ممالک جن میں پاکستان شامل ہے سے تعلق رکھنے والے مقیم تارکین جنہوں نے منظور شدہ ویکسین کی دو خوراکیں لگوائی ہیں سعودی عرب آسکتے ہیں۔‘

سفیر پاکستان کے مطابق ’مملکت میں مقیم وہ پاکستانی جو کورونا ویکسین کی دو خوراکیں لے کر گئے ہیں انہیں واپسی کی اجازت ہوگی‘۔

سعودی وزارت داخلہ نے بھی بیان میں کہا کہ ’کورونا ویکسین کی دونوں خوراکیں لینے والے مقیم غیرملکی ممنوعہ ممالک سے سعودی عرب واپس آسکتے ہیں‘۔

سرکاری خبر رساں ایجنسی اس پی اے کے مطابق وزارت داخلہ کے عہدیدار نے بیان میں کہا کہ’ مملکت نے اس سے قبل مختلف ملکوں سے سعودی عرب آنے پر عارضی پابندی عائد کی تھی‘۔

’یہ پابندی ممنوعہ ممالک سے گزرنے والے ان لوگوں پر بھی تھی جو مملکت آنے سے 14 روز کے اندر ممنوعہ ممالک میں سے کسی ایک ملک گئے ہوں یا وہاں سے گزرے ہوں‘۔

وزارت داخلہ کا کہنا ہے کہ ’اب اس بات کی اجازت دی گئی ہے کہ ممنوعہ ممالک سے ایسے مقیم غیرملکی سعودی عرب واپس آسکتے ہیں جو مملکت سے روانگی سے قبل یہاں کورونا ویکسین کی دونوں خوراکیں لگوا چکے  ہوں‘۔

’یہ لوگ براہ راست سعودی عرب واپس آسکتے ہیں البتہ متعلقہ اداروں کی جانب سے مقرر کردہ تمام حفاظتی تدابیر کی پابندی برقرار رہے گی‘۔ 

سعودی عرب میں پاکستانی سفارتخانے نے ٹوئٹر پر ایک بیان میں کہا کہ’ سفارتخانہ پاکستان سعودی حکومت کے اس فیصلے کا خیر مقدم کرتا ہے جس کے تحت اقامہ ہولڈرز اور ان لوگوں کے لیے جو مملکت سے روانگی سے قبل یہاں کورونا ویکیسن کی دو خوراکیں لگوا چکے ہیں پاکستان سے براہ راست پروازوں کی اجازت دی گئی ہے‘۔

یاد رہے کہ اس سے قبل متعدد ممالک میں سعودی سفارتخانوں نے بیان میں کہا تھا کہ ’سفری پابندی والے ممالک سے ویکسین کی دونو ں خوراکیں لینے والے مملکت براہ راست جاسکتے ہیں‘۔  

 قاہرہ میں سعودی سفارتخانے کا بیان میں کہنا تھا کہ ’سفری پابندی والے ممالک کے وہ باشندے جو مملکت سے سفر سے قبل وہاں ویکسین کی دونوں خوراکیں لے چکے ہیں سعودی عرب کا سفر براہ راست کرسکیں گے‘۔

’ یہ فیصلہ بیرون مملکت موجود ان تارکین وطن پر بھی لاگو ہوگا جو سعودی عرب سے روانہ ہونے سے قبل مملکت میں کورونا ویکسین کی دو خوراکیں لے چکے ہوں گے‘۔