ولی عہد کی نیابت کرتے ہوئے گورنر مکہ کی اونٹ دوڑ میں شرکت

ولی عہد شہزادہ محمد بن سلمان کی نیابت کرتے ہوئے گورنر مکہ مکرمہ شہزادہ خالد الفیصل اونٹ دوڑ کی اختتامی تقریب میں شرکت کریں گے۔

سعودی پریس ایجنسی کے مطابق اونٹ دوڑ مقابلہ ولی عہد کے کپ پر منعقد ہو رہا ہے جس میں ملک کے بہترین اونٹوں کے درمیان مقابلہ ہوگا۔

اونٹ دوڑ مقابلے کروانے والے ادارے اور سعودی اولمپک  کی اعلی کمیٹی کے سربراہ شہزادہ عبد العزیز بن ترکی الفیصل نے ولی عہد شہزادہ محمد بن سلمان کا روایتی مقابلوں کی سرپرستی کرنے پر شکریہ ادا کیا ہے۔

انہوں نے کہا ہے کہ ’بین الاقوامی مقابلہ تیسری مرتبہ منعقد ہو رہا ہے جس میں بڑی تعداد میں شہری شریک ہیں‘۔

انہوں نے کہا ہے کہ ’اختتامی تقریب میں اونٹوں کے درمیان 204 راؤنڈ ہوں گے جس میں مجموعی طور پر 53 ملین ریال مالیت کے انعامات دیئے جائیں گے‘۔

’تمام راؤنڈ میں سب سے زیادہ پوائنٹ لینے والے اونٹ کے مالک کو ولی عہد کی طرف سے تلوار کا تحفہ دیا جائے گا‘۔

دوسری طرف ماہرین کا کہنا ہے کہ ’دوڑ میں شامل ہونے والے اونٹوں کی مجموعی قیمت 279 ملین اور372 ملین ریال کے درمیان ہے‘۔

’پہلے چار راؤنڈ میں شامل ہونے والے بہترین اونٹ ہیں جن میں سے ایک کی قیمت تین ملین ریال سے شروع ہوتی ہے‘۔