’سفری پابندیاں ختم کرنے کا اصول مقیم غیرملکیوں پر بھی لاگو ہوگا‘

سعودی  وزارت داخلہ نے کہا ہے کہ’ سفری پابندیاں ختم کرنے کا اصول سعودی شہریوں پر ہی نہیں بلکہ مقیم غیرملکیوں پر بھی لاگو ہوگا‘۔  

سرکاری خبر رسا ں ایجسنی ایس پی اے اور اخبار 24 کے مطابق وزارت داخلہ کے ترجمان طلال الشلھوب نے کہا کہ’ حالیہ دنوں میں جن ملکوں پر سے سفری پابندیاں ختم کرنے کا فیصلہ کیا گیا ہے اس کا فائدہ سعودی شہریوں اور مقیم غیرملکیوں دونوں کو ہوگا۔‘

 اتوار کو نئے کورونا وائرس کی تازہ صورتحال پر پریس کانفرنس میں ترجمان نے کہا کہ ’جن ممالک سے سفری پابندی اٹھائی گئی ہے ان کے  شہری سعودی عرب آ سکیں گے بشرطیکہ وہ اب تک ممنوعہ فہرست میں شامل ممالک سے نہ گزرے ہوں۔‘

انہوں نے کہا کہ ’جو شخص بھی پابندی والے ممالک گیا ہوگا اسے سعودی عرب آنے سے قبل 14 روز اجازت یافتہ ممالک میں سے کسی ایک ملک میں گزارنا ہوں گے۔‘

یاد رہے کہ سعودی عرب نے متحدہ عرب امارات، جنوبی افریقہ اور ارجٹینا کے لیے بری، بحری اور فضائی سرحدیں کھولنے کا اعلان کیا تھا۔

’وزارت داخلہ نے  ہدایت کی ہے کہ  کورونا ایس او پیز کی پابندی کرتے رہیں اس حوالے سے بے پروائی نہ برتیں۔‘