سعودی عرب میں کورونا کے نئے کیسز کم ہوکر 63 رہ گئے

سعودی عرب میں پیر 20 ستمبر کو بھی کورونا کے نئے کیسز 100 سے کم سامنے آئے ہیں جبکہ فعال کیسز کی تعداد میں بھی کمی آئی ہے۔ 

پیر کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 63 نئے مریض سامنے آئے جبکہ 71 افراد صحت یاب بھی ہوئے۔

وزرات صحت کے مطابق ’گذشتہ 24 گھنٹوں کے دوران کورونا کے مزید 5 مریض چل بسے، جس کے بعد مرنے والوں کی مجموعی تعداد بڑھ کر آٹھ  ہزار 667 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز کی تعداد کم ہو کر 2 ہزار 343 رہ گئی ہے، جن میں سے 339 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض مکہ ریجن میں سامنے آئے، جن کی تعداد 15 ہے جبکہ ریاض ریجن میں 13 افراد میں وائرس کی تصدیق ہوئی۔‘

الشرقیہ ریجن 7، مدینہ ریجن میں 5،عسیر ریجن میں 3، جازان ریجن میں 2، قصیم ریجن میں 5 ،نجران ریجن میں 5J حائل ریجن میں 3، تبوک ریجن ، الباحہ ریجن ، الجوف ریجن اور الحدود لشمالیہ ریجن ایک،ایک مریض سامنے آئے۔

اب تک پانچ لاکھ 46 ہزار 612 افراد میں کورونا وائرس کی تصدیق ہو چکی ہے، جن میں سے پانچ لاکھ 35 ہزار 602 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘