Sorry, you need to enable JavaScript to visit this website.

برطانیہ: ’شہبازشریف، خاندان کے خلاف منی لانڈرنگ کے ثبوت نہیں ملے‘

شہبازشریف اور سلیمان شہباز کے بینک اکاؤنٹس دسمبر2019 میں عدالتی حکم پر منجمد کیے گئے تھے۔ (فوٹو: ٹوئٹر)
برطانوی نیشنل کرائم ایجنسی نے کہا ہے کہ اپوزیشن لیڈر شہباز شریف  اور ان کے خاندان کے  بینک اکاؤنٹس میں منی لانڈرنگ، کرپشن اور مجرمانہ سرگرمی کا کوئی ثبوت سامنے نہیں آیا ہے۔ایجنسی نے اپنی ایک رپورٹ میں کہا ہے کہ21 ماہ کی تحقیقات میں 20 سال کے مالی معاملات کا جائزہ لیا گیا۔
تاہم مشیر داخلہ و احتساب بیرسٹر شہزاد اکبر نے کہا ہے کہ شہباز شریف اورسلمان شہباز کی بریت کی خبر غلط اور مس رپورٹنگ ہے۔  اپنے بیان میں ان کا کہنا تھا کوئی ٹرائل تھا ہی نہیں جو بریت ہوتی۔
رپورٹ کے مطابق برطانوی ایجنسی نے حکومت پاکستان، نیب اورایسٹ ریکوری یونٹ کی درخواست پر تحقیقات شروع کی تھیں جب کہ تحقیقات کے دوران شہباز شریف اور شریف خاندان کے برطانیہ اورمتحدہ عرب امارات میں اکاونٹس کی چھان بین کی گئی۔
نیشنل کرائم ایجنسی کی رپورٹ کے بعد شہباز شریف اور سلیمان شہباز کے منجمد بینک اکاؤنٹس بحال کر دیے گئے۔
واضح رہے کہ شہبازشریف، سلیمان شہباز کے بینک اکاؤنٹس دسمبر2019 میں عدالتی حکم پر منجمد کیے گئے تھے۔
دوسری جانب مسلم لیگ نواز نیشنل کرائم ایجنسی کی رپورٹ کی خبر کو اپنی لیڈرشب کی بے گناہی اور حکومتی انتقامی سیاست کے ایک اور ثبوت کے طور پر پیش کر رہی ہے۔  پیر کو مذکورہ خبر سامنے آتے ہی ن لیگ کے رہنماؤں نے اس رپورٹ کو ہاتھوں ہاتھ لیا اور ٹی وی ٹاک شوز میں اسے پارٹی قیادت کی دیانت داری اور شفافیت کے ایک اور دلیل کے طور پر پیش کیا۔
تاہم حکمران تحریک انصاف کے رہنما اس حوالے سے خاموش نظر آئے۔ رپورٹ کے حوالے سے حکمران پارٹی کے ارکان ٹی وی چینلز کے ٹاک شوز سے بھی عائب تھے۔
تاہم مشیر احتساب کا کہنا تھا کہ برطانوی حکام نے 2019 کے کچھ فنڈز کو مشکوک قرار دے کر تحقیقات شروع کی تھیں۔
انہوں نے کہا کہ مشکوک فنڈز پر برطانوی حکام نے کورٹ سے فریزنگ آرڈر حاصل کر رکھا تھا۔ این سی اے نے خود تحقیقات روک کر فنڈز ریلیز کرنے کا فیصلہ کیا۔ شہزاد اکبر کے بقول ’ریلیز آرڈر کا مطلب نہیں کہ فنڈز جائز ذرائع سے وصول ہوئے تھے۔‘

مسلم لیگ ن کا ردعمل

شہباز شریف نے برطانوی عدالت کا فیصلہ سامنے آنے کے بعد ٹویٹ کرتے ہوئے لکھا ’میں اللہ کا شکر ادا کرتا ہوں۔ برطانوی عدالت کا آج کا فیصلہ نہ صرف میری، نواز شریف بلکہ پاکستان کی بھی بریت ہے۔ یقیناً سچ جھوٹ، من گھڑت کہانیوں اور کردار کشی سے بہت بڑی طاقت ہے۔‘
پاکستان مسلم لیگ ن کی ترجمان مریم اورنگزیب نے شہزاد اکبر کی ٹویٹ پر ردعمل دیتے ہوئے کہا کہ برطانیہ کی عدالت کے فیصلے میں شہباز شریف اور ان کے خاندان کی بریت سے عمران خان کی جانب سے کرپشن اور منی لانڈرنگ کے بے بنیاد اور حیران کن دعوؤں کی قلعی کھول دی ہے۔
’برطانیہ کی نیشنل کرائم ایجنسی نے 21 ماہ تک 20 سال کے عرصہ پر محیط عالمی تحقیقات کیں۔ پاکستان کی تاریخ میں کسی بھی عوامی عہدیدار کو ایسے عالمی تحقیقات کا سامنا کبھی نہیں کرنا پڑا۔ عمران خان ایک عطائی کے طور بے نقاب ہوگئے جو صرف ایماندار عوامی عہدیداروں کی کردار کشی کر سکتے ہیں۔ کرپشن کا جھوٹا بیانیہ ایک عمران خان کی بے ایمانی اور نااہلی پر پردہ ڈالنے کی ناکام کوشش ثابت ہوا ہے۔‘

شیئر: