کپ کیک سے دنیا کا سب سے بڑا پرچم تیار کرنے کا ریکارڈ

سعودی عرب کے 91 ویں یوم الوطنی کی مناسبت سے مشرقی ریجن میں کپ کیک سے دنیا کا سب سے بڑا پرچم تیار کرنے کا ریکارڈ قائم ہوا ہے۔

سبق ویب سائٹ کے مطابق الخبر کے الراشد مال میں کب کیک سے تیار کیے جانے والے سعودی پرچم کو گینز ورلڈ ریکارڈ میں درج کیا گیا ہے۔

کپ کیک سے تیار کیے جانے والے دنیا کے سب سے بڑے پرچم کی تیاری میں سرکاری ونجی اداروں سمیت پکوان کے ادارے زادک کے علاوہ رضاکاروں کی بڑی تعداد نے شرکت کی ہے۔

پکوان ادارے زادک کی سربراہ رانیہ معلا نے کہا ہے کہ ’پکوان کا فن سیکھنے والے 40 طلبہ وطالبات نے پرچم کا مواد تیار کیا ہے‘۔

’150 مربع میٹر پرچم میں 15 ہزار کپ کیک، 19 ہزار کھجوریں اور 91 لیٹر کھجوروں کا رس استعمال کیا گیا ہے‘۔

’مختلف غذائی مواد میں صرف مقامی پیداوار استعمال کی گئی ہے جبکہ مٹھاس کے چینی کے بجائے کھجور کا استعما ل کیا گیا ہے‘۔

’سرگرمی کا مقصد حب الوطنی کا اظہار ہے، بعد ازاں تقریب کے اختتام کے بعد پرچم کو کھول کر اسے مستحقین میں تقسیم کیا گیا ہے‘۔