مصر میں چور کو صحافی کا فون چُرانا مہنگا پڑ گیا، کارروائی فیس بک لائیو پر چلی گئی

مصر کے دارالحکومت قاہرہ میں ایک صحافی کی لائیو رپورٹنگ اچانک ہی ایک فلمی سین میں تبدیل ہو گئی جب موٹر سائکل پر سوار ایک چور نے موبائل چھین لیا۔

عرب نیوز کے مطابق مصری اخبار یوم سیون سے وابستہ ایک صحافی دارالحکومت قاہرہ میں آنے والے زلزلے کی لائیو رپورٹنگ اپنے موبائل کے ذریعے کر رہا تھا کہ اچانک موٹر سائیکل پر سوار ایک چور  تیزی سے آیا اور فون چھین کر لے گیا۔ 

لیکن چور کو یہ معلوم نہیں تھا کہ تمام واقعہ لائیو سٹریمنگ کے ذریعے ناظرین دیکھ رہے ہیں۔

چور نے موبائل موٹر بائیک پر اس طرح سے رکھا کہ کیمرہ اس کے چہرے کی طرف تھا۔

یوم سیون نے فیس بک لائیو چور کے چہرے کے ساتھ ہی چلنے دیا جسے اخبار کے مطابق ہزاروں کی تعداد میں لوگ دیکھ رہے تھے۔

پولیس نے اس دن چور کی شناخت کرتے ہوئے اسے گرفتار کر لیا ہے۔

فیس بک کے بعد ویڈیو دیگر سوشل میڈیا پلیٹ فارمز پر بھی شائع ہو گئی تھی جس پر صارفین چور کی بدقسمتی کے حوالے سے تبصرے کر رہے ہیں۔