نیپالی خاتون نے 10ویں مرتبہ ماؤنٹ ایوریسٹ سر کر کے اپنا ہی ریکارڈ توڑ دیا

نیپالی قبیلے شرپا سے تعلق رکھنے والی کوہ پیما شرپا خاتون نے دسویں مرتبہ دنیا کی بلند ترین چوٹی ماؤنٹ ایوریسٹ سر کر کے اپنا ہی ریکارڈ توڑ ڈالا ہے۔

وہ پہلی خاتون ہیں جنہوں نے 10 مرتبہ ماؤنٹ ایوریسٹ سر کی ہے۔

امریکی نیوز ایجنسی ایسوسی ایٹڈ پریس کے مطابق جمعرات کی صبح لکپا شرپا اور دیگر کوہ پیما اچھے موسم کا فائدہ اٹھا کر آٹھ ہزار 849 میٹر بلند چوٹی پر پہنچے۔

ان کے بھائی منگما گیلو نے بتایا کہ ان کی بہن کی صحت ٹھیک ہے اور وہ چوٹی سے نیچے آ رہی ہیں۔

لکپا شرپا کی عمر 48 برس ہے۔ وہ باقاعدہ تعلیم اس لیے حاصل نہ کر سکیں، کیونکہ وہ بچپن ہی سے ٹریکرز کی مدد کر کے پیسے کماتی تھیں۔

وہ ہمیشہ کہتی تھیں کہ وہ باقی خواتین کو متاثر کرنا چاہتی ہیں تاکہ وہ بھی اپنے خواب پورے کر سکیں۔

لکپا شرپا اپنے تین بچوں کے ساتھ اب امریکہ میں رہتی ہیں۔

اس سے قبل شرپا قبیلے سے تعلق رکھنے والے ایک اور کوہ پیما کامی ریٹا نے 26 ویں بار ماؤنٹ ایوریسٹ کو سر کر کے اپنا ہی ریکارڈ توڑا تھا۔