’عقل و شعور کا تعلق عمر سے نہیں‘، بلاول، عمران خان کے بیانات کا موازنہ

پاکستان کے وزیر خارجہ بلاول بھٹو زرداری کی نیویارک میں صحافیوں سے گفتگو کے دوران ایک سوال کے جواب کی ویڈیو سوشل میڈیا پر وائرل ہو رہی ہے۔

جمعرات کو امریکہ میں صحافیوں سے بات چیت کے دوران پاکستانی وزیر خارجہ نے سابق وزیراعظم عمران خان کے دورہ روس کا دفاع کرتے ہوئے کہا تھا کہ ’کسی کو علم نہیں تھا کہ روس اور یوکرین کے درمیان تنازع کا آغاز ہوجائے گا۔‘

بلاول بھٹو کا سابقہ حکومت کی خارجہ پالیسی کا دفاع کرنے پر سوشل میڈیا صارفین ان پر داد و تحسین نچھاور کر رہے ہیں اور ان کے سیاست کے طریقے کا سابق حکومت عمران خان کی سیاست سے موازنہ بھی کیا جا رہا ہے۔

نیویارک میں وزیر خارجہ کے بیان پر تبصرہ کرتے ہوئے ڈاکٹر امینہ تنویر نے لکھا کہ ’امریکہ میں گلوبل لیڈرز اور میڈیا سے بات چیت کے دوران بلاول بھٹو زرداری نے پی ٹی آئی یا عمران خان کے بارے میں کوئی منفی بات نہیں کی۔‘

’اب ذرا عمران خان کے بارے میں سوچیں، وہ اپوزیشن اور ملک پر تنقید کرتے۔ آپ کو فرق نظر آرہا ہے۔‘

صحافی کامران یوسف نے لکھا ‘میرے خیال میں عمران خان کے ترجمان بھی اس متاثر کن طریقے سے ان کے روس کے دورے کا دفاع نہیں کرسکے تھے جس طرح بلاول نے کیا۔‘

کچھ صارفین کی جانب سے سابق وزیراعظم عمران خان کی امریکہ میں ایک ریلی سے خطاب کی کلپ بھی شیئر کی گئی۔ اس کلپ میں وزیراعظم عمران خان کہہ رہے تھے کہ ’شاہد خاقان عباسی بار بار تقریریں کر رہے تھے کہ مجھے جیل میں ڈالو اگر میں نے کچھ غلط کیا۔ جیل میں ڈال دیا اب ہم نے اسے۔‘

رب نواز بلوچ نامی صارف نے عمران خان اور موجودہ وزیر خارجہ کی تقریر کا موازنہ کرتے ہوئے ایک ٹویٹ میں لکھا کہ ’ملک کا ایک بزرگ نمائندہ (عمران خان) امریکہ میں کھڑے ہوکر اپنے ملک کے سابق وزیراعظم (شاہد خاقان عباسی) کے بارے میں کہتا ہے: میں نے انہیں جیل میں ڈال دیا۔‘

انہوں نے بلاول بھٹو زرداری کی گفتگو کا حوالہ دیتے ہوئے مزید لکھا کہ ’جبکہ دوسرا نوجوان رہنما امریکہ میں سابق وزیراعظم کے اقدامات کو ڈیفینڈ (دفاع) کرتا رہا۔‘

’(ٹھیک ہی کہتے ہیں، عقل و شعور کا تعلق عمر سے بالکل نہیں ہوتا۔)

پاکستانی اینکر پرسن منیزے جہانگیر نے اپنی ایک ٹویٹ میں بلاول بھٹو زرداری کے امریکہ کے دورے کے بارے میں لکھا کہ ان کے پاس آنے والی اطلاعات کے مطابق وزیر خارجہ کا دورہ اچھا رہا ہے۔

انہوں نے امریکہ میں مقیم انگریزی روزنامہ ’ڈان‘ کے رپورٹر انور اقبال کو قوٹ کرتے ہوئے لکھا کہ بلاول بھٹو زرداری کے دورہ امریکی کا پاکستان اور امریکہ کے درمیان ہونے والی بات چیت پر اچھا اثر پڑے گا۔

تاہم عمران خان کی حکومت میں وزیر برائے انسانی حقوق شیریں مزاری کو بلاول کے بیان میں ’سازش‘ کا شائبہ نظر آیا۔

انہوں نے ایک ٹویٹ میں بلاول بھٹو زرداری کو ’امپورٹڈ‘ وزیر خارجہ قرار دیتے ہوئے کہا کہ انہوں نے اعتراف کرلیا کہ عمران خان کا دورہ روس درست تھا۔

واضح رہے عمران خان کی حکومت پچھلے مہینے تحریک عدم اعتماد کے نتیجے میں ختم ہوئی تھی اور اس کی وجہ عمران خان ایک امریکی ’سازش‘ کو قرار دیتے ہیں۔

ان کا دعویٰ ہے کہ انہیں روس کا دورہ کرنے پر ہٹایا گیا تھا۔