دراندازوں کوسہولت فراہم کرنے والا شہری گرفتار
نجران کی سپیشل فورس نے ایتھوپیا کے 22 دراندازوں کو زرعی فارم میں رہائش اور ملازمت فراہم کرنے والے سعودی شہری کو گرفتار کیا ہے۔
سعودی خبررساں ادارے ’ایس پی اے‘ کے مطابق ایتھوپیا کے ایک درانداز کے قبضے سے 97720 ریال، 22 موبائل اور موبائل کی سات سمیں بھی برآمد ہوئیں۔
نجران پولیس نے بتایا کہ تمام دراندازوں کو گرفتار کر لیا گیا ہے۔ انہیں قانونی کارروائی کے بعد متعلقہ ادارے کی تحویل میں دے دیا گیا۔ رہائش اور روزگار فراہم کرنے والے مقامی شہری کو بھی پبلک پراسیکیوشن کے حوالے کردیا گیا ہے۔
نجران پولیس کے ترجمان نے تنبیہہ کی کہ جو شخص بھی دراندازی میں کسی کو سہولت دے گا یا دراندازوں کو اندرون ملک سفر یا رہائش یا روزگار وغیرہ کسی بھی شکل میں کوئی تعاون دے گا، اسے 15 برس قید اور 10 لاکھ ریال جرمانے کی سزا ہو گی۔ ٹرانسپورٹ اور رہائش میں استعمال ہونے والی گاڑی اور مکان ضبط کر لیا جائے گا اور تشہیر بھی کی جائے گی۔
