Sorry, you need to enable JavaScript to visit this website.

بلوچستان: سُوئی میں دو مختلف حملوں میں ایف سی کے چار اہلکار جان سے گئے، ایک حملہ آور مارا گیا

حملہ آوروں کی فائرنگ کے بعد ایف سی اہلکاروں کی جوابی کارروائی کے نتیجے میں ایک حملہ آور مارا گیا (فائل فوٹو: اے ایف پی)
بلوچستان کے ضلع جنوبی ڈیرہ بگٹی کی تحصیل سُوئی میں ایف سی پر دو مختلف حملوں میں چار اہلکاروں سمیت پانچ افراد جان سے گئے جبکہ جوابی کارروائی میں ایک حملہ آور بھی مارا گیا۔
ڈیرہ بگٹی پولیس کے ایک افسر نے نام ظاہر نہ کرنے کی شرط پر بتایا کہ ’پہلا حملہ پیر کی صبح سوئی کشمور روڈ پر عنایت شاہ دربار کے قریب ہوا۔‘
اُن کے مطابق ’قریباً ایک درجن مسلح حملہ آوروں نے ایف سی بمبور رائفلز کی تین گاڑیوں پر مشتمل قافلے کو نشانہ بنایا۔ ایف سی کا یہ قافلہ سوئی سے پیرکوہ کی جانب جا رہا تھا۔‘
’حملے میں چار ایف سی اہلکار اور ایک سول ڈرائیور کی جان چلی گئی۔ ایف سی اہلکاروں میں لانس نائیک خانزادہ، نائیک عبدالوحید، سپاہی احسان علی اور لانس نائیک شاہ حسین شامل ہیں جبکہ سول ڈرائیور کی شناخت علی شیر کے نام سے ہوئی ہے۔
فائرنگ کے نتیجے میں ایف سی کا ایک اہلکار زخمی بھی ہوا۔
پولیس افسر کے مطابق ’پیر کی شام سوئی کشمور روڈ پر ایف سی کی ایک چوکی کو بھی نامعلوم موٹر سائیکل سوار حملہ آوروں نے نشانہ بنایا۔‘
’حملہ آوروں کی فائرنگ کے بعد ایف سی اہلکاروں نے جوابی کارروائی کی جس کے نتیجے میں ایک حملہ آور مارا گیا جبکہ دیگر حملہ آور ایک موٹر سائیکل اور اپنے ساتھی کی لاش چھوڑ کر فرار ہوگئے۔‘
ایف سی نے ہلاک حملہ آور کی نعش اور موٹر سائیکل کو تحویل میں لے لیا۔
دوسری جانب سُوئی کے علاقے ڈولی میں بھی نامعلوم افراد کی جانب سے ایک نجی گاڑی کے ڈرائیور کو مبینہ طور پر اغوا کیے جانے کی اطلاع ہے۔ اس واقعے کی مزید تفصیلات سامنے نہیں آسکیں۔
 ڈیرہ بگٹی میں ماضی میں بھی سکیورٹی فورسز، گیس تنصیبات اور دیگر سرکاری و نجی تنصیبات پر حملے ہوتے رہے ہیں۔
بلوچستان کے اس علاقے میں بلوچ عسکریت پسند تنظیم بلوچ ریپبلکن آرمی (بی آر اے) سرگرم رہی ہے۔ طویل وقفے کے بعد شمالی ڈیرہ بگٹی کے علاقے لوٹی میں سنیچر کو ایک گیس کمپنی کے کیمپ پر حملہ کیا گیا۔
اس واقعے میں پولیس کے مطابق کیمپ کی سکیورٹی پر مامور قبائلی امن فورس کے ساتھ جھڑپ میں آٹھ حملہ آور مارے گئے تھے جبکہ امن فورس کا ایک اہلکار ہلاک اور تین زخمی ہوئے تھے۔

دریجی میں موٹر سائیکلوں پر سوار مسلح افراد بینک سے ایک کروڑ 70 لاکھ روپے لوٹ کر فرار ہوگئے (فائل فوٹو: اے ایف پی)

اس حملے کی ذمہ داری بی آر اے نے قبول کی، تاہم سوئی میں پیر کو ہونے والے حملوں کی ذمہ داری تاحال کسی تنظیم کی جانب سے قبول نہیں کی گئی۔
دریجی میں موٹر سائیکلوں پر سوار مسلح افراد کا نجی بینک پر دھاوا، ایک کروڑ 70 لاکھ روپے لوٹ لیے
ادھر کراچی سے متصل بلوچستان کے ضلع حب سے قریباً 115 کلومیٹر دُور دریجی میں 10 موٹر سائیکلوں پر سوار مسلح افراد نے ایک نجی بینک پر دھاوا بول کر عملے کو یرغمال بنا لیا۔
پولیس کے مطابق ’مسلح افراد بینک سے ایک کروڑ 70 لاکھ روپے لوٹ کر فرار ہوگئے۔بینک کی سکیورٹی پر تعینات اہلکار نے حملہ آوروں کا کچھ دیر مقابلہ کیا۔‘
’تاہم اُن کا اسلحہ ختم ہونے کے بعد مسلح افراد بینک میں داخل ہوگئے اور سکیورٹی گارڈز کا اسلحہ بھی اپنے ساتھ لے گئے۔‘
پولیس کا کہنا ہے کہ حملہ آوروں کے ایک گروپ نے دریجی تھانے پر بھی حملہ کیا اور پولیس اہلکاروں کو فائرنگ میں مصروف رکھا، تاہم اہلکاروں نے انہیں تھانے میں داخل نہیں ہونے دیا۔
 اسی دوران حملہ آوروں کے ساتھیوں نے بینک لوٹ لیا۔ بینک اور دریجی تھانے کے درمیان چند سو میٹر کا فاصلہ ہے۔

شیئر: